Kopa 12 Novembru : SCT Hurlele Academica 6-0
Naunil Media (Dili), Sporting Clube de Timor (SCT) hurlele nia ekipa adversáriu Academica FC ho score 6-0 iha jogu Kopa 12 de Novembru faze 16 finais.
Duelo entre ekipa rua ne’e hala’o iha Stadion Munisipal Díli, Tersa (24/11). Iha inísiu jogu parte dahuluk ekipa Sporting Timor, tun kedas ho ambisaun aas no esforsu ne’e susesu rezulta Golu iha minutu 19, liu husi jogadór Silvestre Gama hodi muda score 1-0.
Lecy Atok aumenta golu ida iha minutu 43 hodi hatuur score ba 2-0 to’o termina jogu parte dahuluk.
Kontinua ba jogu parte daruak ekipa Sporting Timor nafatin halo atake maka’as ba Academica FC, ho nune’e tama ba iha minutu 48 Lecy Atok marka tan golu ida hodi muda aumenta score ba 3-0.
Tama ba iha minutu 64 Sporting Timor aumenta tan golu ida liu husi jogador Florndo Magno hodi hatuur score ba 4-0.
Hela ho Score 4-0 ekipa Academica Fc sai hodi halo atake ba Sporting, ho nune’e iha minutu 88 ekipa Sporting de Timor aproveita halo kontra ataka no marka tan golu ida hodi muda aumenta score ba 5-0.
No tama ba iha minutu 90 ekipa Academica fc konsege hetan oportunidade hodi marka golu liu husi suta penalti, no jogador Joel Gaio ne’ebé sai ezekutor ba penalidade refere falla marka golu tanba guarda rede husi Sporting de Timor susesu salva bola ho di’ak.
No tama ba iha minutu 90+3 Sporting de Timor aumenta tan Golu ida hodi muda aumenta score ba 6-0 to’o termina jogu parte daruak vitória ba Sporting de Timor Husi rezultadu vitória ne’e lori ekipa Sporting de Timor hakat ba oitavu final Kopa 12 de Novembru 2020. Dvo
