Lalenok United Kampeaun Ba Kopa 12 de Novembru

Naunil Media (Díli), Lalenok United sai kampeaun ba Kopa 12 de Novembru 2020 hafoin manán nia ekipa adversariu AD.SLB liu husi drama suta penalidade ho score 5-2 iha final.

Antes ne’e ekipa rua empata ho score 1-1 iha tempu normál.

Duelo entre ekipa Lalenok United kontra Makikit Laulara ne’e hala’o iha Stadion Municipal Dili sábadu (12/12).

Iha inisiu jogu Armada Lalenok United hatudu kedas ritmu jogu ne’ebé aas ho nune’e tama ba iha minutu 8 Elias Mesquita lori Lalenok United lidera kedas ho score 1-0.

Avansadu ho númeru kamizola 10 ne’e fura rede Makikit Laulara ne’ebé hein husi junildo Manuel, liu husi suta falta no bola tama direta, ho nune’e score muda aan ba 1-0.

Hela ho score 1-0 halo ekipa Makikit Laulara sai husi fatin hodi halo kontra ataka maibé la konsege responde golu to’o termina jogu parte dahuluk Lalenok united lidera ho score 1-0.

Kontinua ba jogu segunda parte SLB ne’ebé mak sofre uluk golu ida iha parte dahuluk halo kedas mudansa ba tatika liu husi subtituisaun jogador.

Mudansa ne’ebé mak ekipa SLB halo ne’e konsege fo rezultadu pozetivu iha minutu 52 ho nune’e score muda aan ba 1-1.

Golu makikit laulara nian ne’e marka husi jogador Joao pedro, hafoin simu asistensia bola kruza husi Zenivio Mota no Joao pedro fasil tebes hodi marka golu ho nune’e score muda aan ba 1-1.

Ekipa rua ne’e mantein halo kontra ataka ba malu maibé la iha golu ruma mak akontese to’o termina jogu segunda parte score mantein 1-1.

Ho rezultadu empata ne’e ekipa rua tenke kontinua ba marka penalidade no iha sira penalidade ne’e Lalenok konsege marka golu 4 husi na’in 4 mak suta Enkuantu makikit laulara ida de’it tanba rua seluk guarda rede konsege salva hotu ho nune’e vitória ba Lalenok united ho score 5-2. Dvo