SEII Hamutuk Ho Rede Feto Sei Halo Revizaun Ba LVD
Naunil Media Díli), Sekretáriu Estadu Igualidade no Inkluzaun (SEII) Maria do Rosario Fatima Correia Informa, SEII hamutuk ho Rede Feto sei halo revizaun ba lei violensia domestika (LVD), tanba lei ne’e implementa ona tinan 12 maibé seidauk halo revizaun.
“Ita mós seidauk iha artigu espesifiku ida, ita mós sei halo fali revizaun hamutuk ho rede feto atu oinsá halo mós revizaun ba iha lei kontra violensia domestika, tanba lei kontra violensia domestika vigór no implementa ona iha tinan 12 ita seidauk halo revizaun i sei hanoin hela atu halo revizaun”, dehan SEII Maria do Rosario Fatima Correia liu husi diskursu bainhira abertura asembleia jerál rede feto iha Salaun Delta Nova, kinta, (02/06).
Sekretariu Estadu ne’e esplika, Tanba iha artigu balun ne’ebé mak mensiona iha kodigu penal, la mensiona iha lei kontra violensia domestika, ezemplu hanesan danu simples, danu agravante la preve iha lei kontra violensia domestika.
Membru guvernu ne’e mós argumenta katak hanesan kazu insestu, kazu insestu númeru makaas dala barak liu uza artigu violasaun seksual ho abuzu seksual, no haree katak kazu insestu ema nia konseitu hateten katak ran ho ran aman ho oan halo ba malu.
Nia dehan, Seidauk iha definisaun klaru ida ba kazu insestu, tanba ida ne’e mak presiza ema hotu nia advokasia atu bele halo revizaun ba iha lei kontra violensia domestika, maibé Feto barak komesa remata ona sira nia prosesu tuir sistema formal wainhira kuandu lei kontra violensia domestika vigór, feto barak mak komesa ona relata sira nia kazu tuir sistema formal.
Iha fatin hanesan Prezidente rede feto Timor-Leste Zelia Fernandes hatutan, Komprimisiu Sekretariu Estadu Igualidade no Inkluzaun di’ak tebes tanba oinsá tenta haree revizaun kona-ba lei violensia domestika.
“Ohin ita iha Sekretariu Estadu Igualidade no Inkluzaun iha komprimisiu ida di’ak tebes katak Sekretáriu Estadu sei hamutuk ho movimentu feto sira, oinsá tenta haree kona-bá revizaun lei kontra violensia domestika ne’e komprimisiu ida di’ak tebes atu haree”, esplika Prezidente rede feto.
Uluk kuandu lei ne’e seidauk iha ema hotu-hotu ko’alia kona-ba oinsá mak atu halo julgamentu ba violensia domestika, nu fin Promulga tiha lei ne’e iha 2010 implementasaun la’o haree katak iha Progresu hanesan ohin Sekretáriu Estadu hateten feto vitima barak mak iha konsensia hodi halo keixa formal, ba kazu sira ne’ebé sira hasoru iha uma laran no mós iha komunidade tanba konsidera violensia domestika nu’udar krime públiku, hakotu nia. *Jos
