PM Taur: Esforsu Normaliza Ba Mota no Estrada Hetan Estragus Husi Dezastre Naturál
Naunil Media (Díli), Primeiru-Ministru (PM) Taur Matan Ruak, akompaña hosi Ministru Obras Públika (MOP) Salvador Pires, iha sábadu semana ne’e, kontinua hala’o observasaun ba serbisu emerjénsia normalizasaun estrada no mota sira ne’ebé hetan estragus hosi rai monu no mota sobu kauza hosi siklone tropikál Seroja ne’ebé atinji Timor-Leste iha loron 4 fulan abril foin dadauk ne’e.
Iha observasaun ne’e PM Taur haktuir, kompañia sira kontinua esforsu halo normalizasaun ba moru sustentasaun mota ne’ebé monu no suru sés sedimentasaun ne’ebé taka estrada iha Beduku nian ba to’o iha Mota Ulun. Felizmente transporte sira hahu ona viajen Dili Aileu-Dili, maibé husu atu halai ho kuidadu tanba rai tahu no dodok.
“Governu nia fokus iha situasaun emerjensia ne’e, oinsá mak halo uluk atendimentu ba populasaun sira ne’ebé afetadu, aelinde halo serbisu emerjensia hodi normaliza estrada, moru sustentasaun mota, riin eletrisidade no kanu bee moos ne’ebé destruídu atu bele la’o normal fila fali. Enkuantu Governu prepara Komisaun Tékniku ida hodi halo hela planu rekonstrusaun ba infraestrutura sira ne’ebé naksobu mediu no longo praju”. Dehan PM Taur Matan Ruak Naunil Media asesu liuhusi gavineti Primeiru Ministru, segunda ne’e.
Aleinde ne’e Xefe Governu ne’ebé hetan mós akompañamentu hosi Prezidente BEETL-EP, no EDTL-EP, hala’o mós observasaun ba tore eletrisidade ne’ebé daudaun ne’e iha perigu laran tanba rai sorin-sorin monu maka’as iha Beduku foho lolon, inklui riin eletrisidade ne’ebé mak rai hakoi, no kanu distribuisaun bee mai kapitál Dili ne’ebé kotu iha área Mota Ulun nian no mos Eskola Primáriu Kasnafar-Dare. */Vit
