Estrutura UNITAL Tun Direita Ajuda Estudante, Afeta Inundasaun
Naunil Media (Dili) Reitor Universidade Oriental Timor Lorosae (UNITAL), hamutuk ho estrutura Universidade inklui sivitas akademikas sira, mobiliza hodi ajuda estudante hirak ne’ebé mak afeita ba inundasaun ne’ebé akontese iha loron sabadu-dumingu (3-4/04/2021).
Tuir Reitor Florindo Pereira hateten, objetivu husi atividade solidariedade ne’e atu lolo liman ba maluk hirak ne’ebé mak kona susar.
“Horseik, Ohin no aban ami funsionárius no estudantes sira husi UNITAL, ida ne’ebé maka lahetan dezastre, sira organiza malu hodi ajuda ita-nia maluk funsionáriu no estudante sira ne’ebé hetan inundasaun” hateten Reitor ne’e ba jornalista sira iha Aitarak Laran Sabadu (10/4/2021).
Nia hatutan husi atividade solidariedade ne’ebé sira realiza fahe ba fatin tolu (3), ekipa balun iha Maslidun Tasi-Tolu, balun iha Aitarak-Laran balun ba iha Hera.
“Ami seidauk rekolla hotu, tanba balun seidauk identifika hotu, maibé balun ne’ebé ami hetan ne’e, iha Maslidun,Aitarak-laran, Bidau,Hera,no balun iha Becora, ne’e maka ami ba ajuda, maibé kuandu iha informasaun ami sei ba nafatin”, Florindo esplika.
Reitor ne’e deklara hafoin sira ajuda halo limpeza hotu sira sei ajuda nesesidade ba estudante sira tuir kbiit ne’ebé mak sira iha.
“Primeru ami haree lai situasaun no hamos tiha vítima sira nia hela fatin, depois maka ami haree saida maka ami atu ajuda tuir ami-nia kbiit. Ne’ebé ami sei hare’e fila-fali, balun keta hahan uituan ruma karik no buat seluk ruma ami bele ajuda”, nia deklara”
Iha fatin hanesan Estudante Julião Pacheco husi Munisipíu Bobonaro, hanesan vítima ba inundasaun agradese ba parte universidade nomos. organizasaun balun ne’ebé mak ajuda ona sira.
“Organizasaun uniaun more (organizasaun Ermera nian), ne’ebé apoiu ona ami, fos plastik lima, durante nee ami han. No agradese mós ba Universidade tanba sira mai ho fíziku atu tulun ami, non fíziku maka sira latulun maibé realidade sira tulun ho asaun fíziku”,nia relata.
Nia akresenta, sira nain neen maka hela hamutuk uma ida, maibé momentu ne’eba la salva material balun,tanba bee too iha sira nia kakorok. Nune’e kuaze ekipamentus hanesan lap haat, dokumentus eskola inklui dokumentus,motor nia ,no sasan uma laran tomak hetan estragus total.RIT
