Timoroan Iha Inglesa Británia Seidauk Afeitadu Ba Desizaun Sai Husi UE
Naunil Media (Díli), Ministro Negosius Estranjeirus no Koperasaun (MNEC-Sigla Português) Dionisio da Costa Babo Soares, hateten Timoroan sira iha Inglesa Grande Británia seidauk afeitadu ba desizaun sai husi União Europeia (UE) tanba mudansa lejislasaun sira sei aplika hafoin 31 Dezembru 2020.
“Parese que iha Grande Britania rasik sei halo mudansa ba legislasaun barak, lejislasaun sira ne’e sei aplika hafoin 31 Dezembro tinan ne’e, entaun to’o agora ita nia maluk timoroan sira liu-liu ho passaporte Português konsidera hanesan sidadaun Uniaun Eropeia nian seidauk afetadu husi desizaun Brexit ne’e rasik”, hateten MNEC Dionisio da Costa Babo Soares ba jornalista sira iha Parlamentu Nasionál, Segunda (03/02/2020).
Governante iha governu da-ualu, Deonisio Babo, esplika Timor-Leste iha akordu ketak ho governu Inglesa Grande Británia hodi fó protesaun ba timoroan sira iha Brexit.
“Hau dehan katak sai ona husi Grande Británia, iha Uniaun Europeia ita iha embaixada, timoroan barak iha ne’eba sira ho passaporte Portugal nian. Sira konsideradu Europeio maibe hanesan públiku tomak hatene katak sira nia osan sira servisu nian haruka mai Timor-Leste, tanba ne’e governu no estadu nafatin iha interese atu bele fo protesaun ba sira (timoroan)”, salienta Dionisio.
Nia esplika liu tan katak “Timoroan sira bele ba ho pasaporte ita nian hela to’o loron 30 deit, tenke sai fali, maibe pasaporte ba hanesan sidadaun português klaru que nafatin iha direitu iha nasaun Inglesa Grande Britania to’o 31 de Dezembru”.
Governu Inglesa Grande Britania ofissialmente sai ona husi Uniaun Europeia (UE) hahu iha loron 1 Fevreiru tinan 2020 hafoin sai membru durante tinan 47, maske nune’e fim do ano 31 de Dezembro tinan ne’e maka sira foin kompletamente husik tuir lejislasaun sira. Ana
