Traballadór 38 Keixa Kompañia Gardamor Ba SEFOPE
Naunil Media (Dili), Traballadór hamutuk na’in 38, iha Segunda (03/02/2020) ne’e ba hatama keixa iha Sekertária Estadu Profesionál no Empregu (SEFOPE) tanba kompaña Gardamor hapara sira nian kontratu.
Porta voz traballadór Felix Sarmento, hatete hato’o keixa ba SEFOPE hodi ejije sira nian direitu durante tinan barak nia laran servisu hamutuk ho kompañia Gardamor.
“Ami mai hakarak hato’o keixa ne’e iha SEFOPE hodi ejije nafatin ami nia direitu tanba durante tinan 9 to’o 10 nia laran ami servisu hamutuk ho kompana seguransa Gardamor”, haktuir Portavoz Felix Sarmento ba jornalista sira hafoin hato’o keixa ba SEFOPE iha Kaikoli, Díli.
Portvoz ne’e informa tan, hafoin kompañia Gardamor hapara sira nian kontratu, iha loron 01 fulan Janeiru tinan ne’e kompañia Sentiinel husu ba traballador sira submete dokumentus hodi servisu fali iha kompañia refere, maibe infelizmente bosok deit traballadóres.
“Ami hanesan traballdár sente triste ho kompana Gardamos ho Sentinel, sira nia promesa falsu no tebe ami (traballadóres) tuir sira (kompañia) nian gostu deit. Nune’e mak ami hakarak ejije ami nia direitu ne’ebe ho merese no lolos ba kompañia sira. Traballadór sira promote sei halo greve hasoru sekarik kompañia lakohi seluk sira nian direitu ”, ejije trabaldór Felix Sarmento.
Traballadór sira keixa kompañia Gardamor iha SEFOPE bad ala rua ona, iha ne’ebe keixa dahuluk nian iha loron 29 fulan Janeiru no daruak nian akontese iha loron 03 fulan Fevereiru tinan ne’e, maibe infelizmente kompañia lakohi kolabora hodi partisipa iha prosesu mediasaun. Apm
