Komunidade Fatuhada Priense Fixa Família Antisipa Subsídiu U$100

Fahe Tutan

Naunil Media (Díli), Xefe Suku Fatuhada, Marcelino Soares informa,  nia komunidade iha suku refere kada uma kain hahú priense fixa família nian hodi antisipa ba subsídiu U$100  hosi governu iha estadu emerjénsia (EE).

Maracelino Soares ba jornalista sira iha nia rezidénsia iha suku Fatuhada, Postu Administrativu Dom Aleixu, Munisípiu Díli, Sexta (10/04).

“Rejistrasaun fixa família ne’e hanesan antisipasaun ba programa governu nian, maibé ne’e ba suku seluk ha’u la hatene. Hanesan suku Fatuhada iha vizaun katak subsídiu ba kada uma-kain ne’e sei akontese tanba ne’e ami halo rejistu uma kain hodi antisipa” dehan Marcelino.

Xefe Suku ne’e hatutan, maske seidauk iha orientasaun ruma hosi  governu, maibé publika ona iha media governu sei fó subsídiu ba kada uma kain.

“Seidauk iha orientasaun maibé iha media ne’e ko’alia, tanba iha ona eletrisidade gratuita no bee gratuita, agora hela subsidiu no ai-han mak seidauk, tanba ne’e xefe suku no xefe aldeia sira tenke halo ona rejistrasaun bainhira governu husu”, salient Nia.

“Informasaun ne’e ami rona relasiona ho estadu emerjénsia fó sai iha media, dehan ita nia governu sei fó subsídiu U$100 ba kada uma kain, tanba ne’e ami mai trata dokumentu hanesan fixa família iha xefe aldeia no xefe suku”, hateten komunidade suku Fatuhada, Aldeia 05,  Filomena da Costa, Suku Fatuhada

Suku Fatuhada hamutuk  aldeia lima, aldeia rua mak kompleta ona dadus fixa família enkuantu aldeia tolu seluk seidauk. Uar

Leave a Reply

Your email address will not be published.