“Povu Terus Liu Ona”, Xanana Ho Alkatiri Tenke Hamutuk
Naunil Media (Díli), Veteranu Pedro Nunes Menezes, hateten povu terus liu ona tanba kuaze tinan tolu resin Timor-Leste la iha dezenvolvimentu infrastrutura baziku saude, edukasaun no bee moos maibe kontinua moris iha situasaun impase plítiku.
Nune’e Veteranu Pedro Nunes Menezes no atual diretór eskola Sekundária Nobel da Paz husu líder nasionál na’in rua, Kay Rala Xanana Gusmão ho Alkatiri tenke hamutuk hodi rezolve.
“Hau senti povo terus liu ona, primerio mak maun Xanana ho Alkatiri sira nain rua. Senti ba diak ona entaun ba bolu sira nian alin Taur, Lu-olo ho Lere tur resolve sira nian. Sira uluk halo funu no estratejia oioin depois ita ukun an tiha, maibe to’o ohin loron povu terus ba bebeik, sira hanoin ita nian povo ka lae ?. Luta ne’e ba ba nasaun, luta ba povu, entaun sira (líder nasionál) hanoin ba ita nian povu ne’e. hau fiar tanba hau mos passa iha ne’eba (tempu rezistensia) durante tinan hirak nia laran, iha oin koalia ida,iha kotuk sira koalia seluk”, hateten Veteranu no atual director eskola Nobel da Paz, Pedro ba jornalista sira hafoin akompaña nia estudante sira hala’o vizita kortejia ba Parlamentu Nasionál, Segunda (17/02/2020).
Impase polítiku iha Timor-Leste la’o kuaze tinan tolu liu, iha ne’ebe akontese iha tinan 2017 setimu governu no dadaun ne’e iha oitavu governu. Bainhira Orsamentu Jerál Estadu 2020 la pasa iha faze jeneralidade iha Parlamentu Nasionál, tanba bakada governu la a favor proposta OJE ne’ebe aprezenta husi governu Aliansa Mudansa ba Progresu (AMP). OJE faze jeneralidade refere aprezenta husi primeiru ministru Taur Matan Ruak, iha loron 13 to’o 15 fulan janeiru, iha ne’ebe hanesan públiku hotu hatene katak deputadu na’in 13 a favor, 15 kontra no 25 abstensaun.
Enkuantu atu solusiona situasaun impase politiku rai laran, foin lalais ne’e Prezidente Repúblika Francisco Guterres Lú Olo hola inisiativa hodi konvida líder nasionál historiku sira halo dialogu iha palasiu prezidensiál Bairo Píte, maibe líder rezistensia atual prezidente partidu CNRT Kay Rala Xanana Gusmão aujente (la marka prezensa). Ana
