Dalan Hakotu Impasse sei Nakukun
Naunil Media (DILI), maske dia 17 fulan Fevereiru kompleta ona fulan ida hafoin Orsamentu xumba iha Parlamentu Nasionál (PN) 17 Janeiru fulan kotuk, maibé dalan atu hakotu Impasse polítika sei kontinua iha nakukun.
Observador Polítiku Universidade Nasionál Timor Lorosa’e (UNTL), Camilio Ximenes Almedia, hatete, liga ba Impasse polítika iha rai laran hafoin Orsamentu xumba iha Parlamentu Nasionál dia 17 Janeiru mai dia 17 Fevereiru kompleta ona fulan ida.
Maibé Lider Polítiku sira seida’uk iha vontade seriu atu rezolve no kontinua rai hela duvida ba iha públiku no ba povu tomak.
“situasaun politika ne’ebé mosu iha railaran, liu-liu Impasse polítika ne’e ita bele dehan katak to’o agora ohin dia 17 kerdizer katak fulan ida ona ita seidauk iha notisia ne’ebé atu hakotu ba impase politika ida ne’e,”dehan Observador Polítiku UNTL, Camilio, ba Naunil Media iha UNTL, segunda, (17/02/2020).
Atual Dekanu Fakuldade Siensia Polítika UNTL afirma, diálogu ne’ebé Prezidenti Repúblika konvoka la’o dadauk ona, más nu’udar sidadaun husu Lider Polítiku sira buka solusaun ona ba impasse polítika ida ne’e atu labele dada naruk tan.
“ba ha’u, ita nu’udar sidadaun bai-bain ida ho situasaun polítika sira hanesan ne’e ita hakarak labele kontinua ho situasaun sira hanesan,”Dekanu Siensia Polítika UNTL, Camilio, hatete.
Tanba tuir Camilio katak, afeta ne’e la’ os ba lider sira, dala ruma ba ita nia povo sira bain-bain hanesan povu agrikultor ita lakohi para situasaun sira ne’e kuntinua.
Nia sublina, kestaun poder ka figura atu asume Kargu Primeiru Ministru iha governu foun mai, ne’e la’os povu nia problema.
Povu tomak nia esperansa maka governu foun mai ne’e bele seguru hodi kontinua servisu nebe Oitavu governu lakonsege halo to’o nia mandatu 2023.
“hau hanoin katak sa’e ba Primeiru Ministru, partidu ida nebe maka forma fali Nonu governu, ne’e La’os ita nia problema, más se bele karik nasaun ida ne’e no povo ida ne’e presiza tenki iha governu ida ne’ebe mak bele mai seguru no kontinua servisu sira ne’ebé mak Oitavu Governu karik la konsege halo to’o tempo ne’ebe mak determinadu kerdizer to’o 2023,”Camilio esplika.
Sorin seluk Dekanu Fakuldade Direitu, Universidade Díli (UNDIL), Alarico M.Tilman, hatutan, atu solusiona impasse politika ida ne’e, ita haree ba Prezidente Repúblika fó sai ona tuir Konstituisaun RDTL artigu 86.
“agora deklarasaun ne’ebé Prezidenti Repúblika fó sai ne’e hanesan meus ne’ebe tuir dalan konstitusional iha artigo 86,” dehan dosente UNDIL ba Naunil Media.
Nia re-afirma, Konstituisaun artigu 86 ne’e katak, funsaun Prezidenti Repúblika anties atu tama iha ultimu faze ka ida ikus ne’e maka sei labele ona entaun ikus rona husi ita nia konsellu estadu, partidu polítiku sira hotu bele fó ideias oinsa atu bele resolve ita nia situasaun polítika iha rai laran.
Nia sublina, agora ita iha hela Partidu bo’ot rua, hanesan Fretilin ho CNRT karik konsege duni forma nonu governu ne’e hanesan meios ida, Duke ba tan elisaun antisipada daruak.
Tanba ida ne’e maka ita nia povo sira nia hakarak katak, ita nia ukun an ne’e tenke prense ho desenvolvimento ne’ebe orienta ba ema nia moris diak bem Estadu. FCP/CSB
