Iha Problema COVID-19, Vendedór Sira Merkadu Lospalos Fa’an Produtu La Folin

Naunil Media (Lautém), Vendedór sira iha Merkadu Sentral Lospalos Villa Munisipiu Lautém deklara, dadaun ne’e sira fa’an produtu la folin kompara ho tempu babain tanba ho problema pandemia corona virus (COVID-19).

“Bainhira corona virus ka COVID-19 ne’e espalla iha Timor laran tomak, inklui iha ne’e (Lospalos), ami fa’an produtu sira mos la folin ona. Ami sente triste tamba produtu ne’ebe ami fa’an, kompradór sira mai hola lahanesan tempu babain (normál)”, hateten vendedór Elias Ximenes ba Naunil Media, bainhira nia fa’an ninia modo iha merkadu Sentra Lospalos Villa, Kuarta (25/03).

Vendedór ne’e kompara, iha tempu babain ka normal nia fa’an kada loron, be;e hetan lukru U$ 60.00 to’o U$ 100.00 maibe ikus-ikus ne’e laiha ona, ema hotu tauk la ba kompra sasan iha merkadu, tanba atu evita aan hosi COVID-19.

Nune’e Vendedór ne’e husu ba ema hotu husu orasaun reza ba Aman Maromak   

atu pandemia moras corona virus labele da’et ba populasaun sira inosente. No husu mos ba estadu no governu Timor-Leste atu fó atensaun sériu hodi halo prevensaun ba virus refere.

Iha fatin hanesan Vendedóra Cesilia Dias, sente preokupadu ho problema rai laran, liliu kona-ba corona virus tamba fasíl hada’et hosi ema ida ba seluk.

“Ita laiha esperansa ona, ikus mai mosu fali virus ida halo ita trauma no tauk, nune’e ami Sira fa’an iha merkadu ne’e mos senti tauk maibe nesesidade baziku mak obriga ami kontinua fa’an ami nian produtu”, akresenta vendedóra ne’e.

Tuir observasaun jornalista Naunil Media nian iha terenu nota katak, produto ne’ebe vendedór/a sira fa’an iha Merkadu Sentral Lospalos mak hanesan, feuk ropa, koto, fore talin, pateka, batar nurak no seluk tan.

Maibe produtu hirak ne’e balun to’o dodok (at) deit ona tanba kompradór laiha, ema hotu tauk ba merkadu tanba izola an iha idak-idak nia uma hodi hanesan meius prevensaun hasoru pandemia moras corona virus (COVID-19). Lat