PD Prontu Ba Dezisaun PR Fó Sai Loron Eleisaun Parlamentar 2023
Naunil Media (Díli), Sekretáriu Jerál Partidu Demokrátiku (PD) António da Conceicão hateten, Reuniaun ida ne’ebé Prezidente Repúblika nia konvite atu ohin oportunidade ba Partidu Demokrátiku mai fahe hanoin ba Xefe Estadu kona-bá preparasaun ba eleisaun parlamentár 2023 ne’ebé sei mai.
“PD mai ho ninia estrutura nasionál, Prezidente Partidu hamutuk ho Prezidente CPN no Vise sira mai hasoru Xefe Estadu hodi fó hanoin tetu ba situasaun sira ne’ebé, oras ne’e daudauk la’o hela no kaer mós ba regra normál ne’ebé hatuur iha Konstitusaun RDTL”, dehan Sekretáriu Jerál Partidu Demokrátiku (PD), ba jornalista sira iha Palásiu Presidente Bairro Pite, (02/02).
Nia afrima, PD nafatin hein desizaun ne’ebé Prezidente Repúblika iha no kaer metin nafatin ba prinsipiu sira iha Konstituisaun, katak governu ne’e iha kada tinan lima-lima nia laran no bainhira loos mak governu foun ne’e atu mosu, liu husi eleisaun parlamentár ida ne’e Xefe Estadu nia liman no Xefe Estadu mak sei deside.
“Ami mós mai hanesan partidu ne’ebé moris halo tinan 22 no mai nafatin fó garantia ba Xefe Estadu dehan PD prontu nafatin atu hasoru eleisaun parlamentár 2023 hanesan mós 2018 liu ba”, katak nia.
Tanba ne’e, Desizaun iha Xefe Estadu nia liman atu aban ka bainrua ka semana oin ka fulan oin PD hamriik tuir nafatin saida mak Xefe Estadu deside.
PD nia estrutura la’o iha aldeia hotu-hotu no estrutura sira ne’e,tuir baze dadus PD ninian iha ona 29.000 ne’ebé tama estrutura PD ne’e iha teritóriu nasionál hodi halo servisu no preparasaun ba eleisaun parlamentár mai, nia haktuir.
“PD nafatin la’o hela iha baze no aldeia sira no PD nia espetativa mak prepara an ba eleisaun ho pozisaun ida ne’ebé PD iha ona katak Maubere oan prontu serbí”, tenik nia
PD atu halo koligasaun ka la’o mesak ida ne’e la’ós kestaun ne’ebé, PD ko’alia agora tanba partidu hotu-hotu sei mai hasoru Xefe Estadu no partidu ida-diak sei prepara nia kondisaun no PD rasik halo tiha ona konferênsia nasionál ne’ebé lejitima mós rezultadu kongressu anteriór no prienxe ona rekezitu ne’ebé lei ejije, hateten nia.
Kona-bá kadeira aumenta ida ne’e mak espetativa PD nian, tenke ser ho espetativa ida aumenta ninian, no se bele foti tan balun-balun ne’ebé iha Parlamentu Nasionál tabik tan ho PD nian ida ne’e mak loos, hakotu nia. Ana
