Proposta Alterasaun Lei OJF La Pasa Iha PN
Naunil Media (Díli), Diskusaun ajenda pedidu proposta lei Orsamentu Jestaun Finanseira (OJF) hosi governu konstitusionál Da-Ualu, iha Kuarta (25/03) ne’e la pasa iha Parlamentu Nasionál (PN) ho rezultadu votu a favór 31, kontra 33 no abstensaun mamuk (0).
Prezidente Parlamentu Nasionál (PPN), Arão Noe de Jesus da Costa Amaral, hateten pedidu proposta alterasaun lei OJF ne’e sei kontinua baixa ba komisaun C hodi debate ho situasaun normál, tanba pedidu ne’e ho karater urjénsia kona-ba proposta lei númeru 12/V (2ª) alterasaun ba datoluk lei númeru 13/2009, 21 de Outubru kona ba Orsamentu Jestaun Finanseira.
“Alterasaun lei OJF ne’ebé ho karakter urjénsia la liu iha votasaun, ita sei baixa ba iha komisaun C hodi halo fali audensia nian”, hateten PPN Arão Noe.
Xefe Bankada Parlamentár Partidu Demokrátika (PD), António da Conceição ‘Kalohan’ iha nia intervensaun, hatete pedidu ho karakter urjénsia husu governu halo revizaun ba lei Orsamentu Jestaun Finanseira nian.
“Hau konsidera pedidu ho karater urjénsia mai hosi situasaun dilematik rua, ida iha ambitu polítiku no iha ambitu jurídiku. Ita iha situasaun rua iha ambitu polítiku ezitensia governu hala’o liu ona prosesu ne’ebé agora sei pendente hela iha prezidente Republika nia liman”, dehan Kalohan.
Nia husu, revizaun didi’ak ba artigu 31 kona-ba lei Orsamentu Jestaun Finanseira, ladun oportunu atu halo revizaun ba lei estruturante refere, maibe proposta alterasaun hosi governu konstitusionál da-ualu ne’e lori deputadu/a sira ba duvida barak, tanba ne’e presiza deskute iha tempu ne’ebe oportunu. Ana
