Membru F-FDTL Nain-136 Promove ba Postu Kabu
Naunil Media (Díli), Sesta (10/07) ne’e, iha Quartel Jenerál Fatuhada, Komandu FALINTIL Forsa Defeza Timor-Leste (F-FDTL) ofisialmente promove diviza soldadu nain atus ida tolu nulu resin neén (136) ba postu kabu.
Promosaun diviza ne’e lidera husi Xefe Estadu Maiór F-FDTL, Koronél Calisto Santos Coli ‘Coliati’ hodi tula diviza postu kabu ba soldadu feto nain sia (9) no mane nain atus ida rua nulu resin hitu (127).
Xefe Estadu Maiór F-FDTL, Koronél Calisto Santos Coli ‘Coliati’, hateten promosaun diviza ne’e nia sentidu atu fó rekuiñesementu ba military promovidu hotu ba méritu, profesionalizmu, komitmentu disiplina hanesan militar.
“Ita bo’ot sira aumenta tan pasu ida responsabilidade hanesan militar”, afirma Xefe Estadu Maiór F-FDTL, Koronél Calisto Santos Coli ‘Coliati’, liu husi nia deskursu.
Xefe Estadu Maiór F-FDTL, Koronél Calisto Santos Coli ‘Coliati’, hateten pasu hakat ba oin depende ba promovidu ida-idak ninia kapasidade, komitmentu, integridade pesoál no disiplina mak sei determina.
“Hahu ba oin, kaer metin regulamentu militar nian mak sai fatór determinante to’o ba iha future hodi kumpri nafatin hanesan ema militar ba lutu nasaun nian”, apela Xefe Estadu Maiór F-FDTL, Koronél Calisto Santos Coli ‘Coliati’.
Tuir despaixu 01/2020 lista militar promove ba postu kabu no tuir akordu lei númeru 4 artigu 84 iha dekretu lei númeru 28/2016, 13 fulan Jullu husi alterasaun ba dekretu lei númeru 7/2014, 12 Marsu, estatutu militar F-FDTL deklara compete husi xefe estadu Maiór F-FDTL liu husi promove militar sarjentu no prasa.
Xefe Estadu Maiór F-FDTL, Koronél Calisto Santos Coli ‘Coliati’ promove fó diviza ne’e liu-husi análiza prosesu individual ba militar sira ne’e promove respetiva no kondisaun jerál no espesiál ba romosaun determina hodi promove soldadu hirak ne’e ba postu kabu ho eskoilla konforme númeru 1,2,3 iha artigu 52 no alineia a,b,c iha artigu 6, efeitu a partir hahu iha loron 10 Jullu 2020.
Membru F-FDTL soldadu nain-136 kompostu husi Komponente Terestre nai’n-22, Komponente Naval nain-45, Komponente Apoiu servisu nain-23, Sentru Formsaun de Terenu nain-2 no Unidade ida husi Polisia Militar nain-12. Flo/Leo
