FEATUREDIkus LiuNewsPolitika

ATTL-BNCTL Dezenvolve Sistema Pagamentu Impostu Online

Fahe Tutan

Naunil Media (Díli), Sesta (10/07) ne’e, Ministériu Finansa (MF) liu husi Autoridade Tributária Timor-Leste (ATTL) lansa sistema aplikasaun pagamentu online ne’ebe deqzenvolve hamutuk ho Banku Sentral Timor-Leste (BCTL-Sigla Português) ho sistema P-24 hodi fasilita kontribuente no emprezáriu sira atu hasa’e reseita doméstika.

Diretora Jerál ATTL, Monica Rangel da Crúz, informa ekipa tékniku ATTL no BCTL servisu hamutuk hodi dezenvolve no tama ona faze finalizasaun ba sistema pagamentu impostu online.

“Husi Autoridade Tributária servisu hamutuk ho BCTL ne’ebé lidera husi Vise-Governadór Banku Central, ne’ebé iha faze finalizasaun atu nu’uné bele promove sistema P-24 katak pagamentu ba tipu impostu sira bele asesu direita husi ita nia ATM sira iha kualkér banku sira iha Díli no mos munisípiu sira” esplika Diretora Jerál ATTL, Monica Rangel da Cruz, Ministériu Finansa, Aitarak-Laran.

Diretóra Monica Rangel dehan, planu implementasaun sistema kuandu finaliza ona Ministériu Finansa hamutuk ho ATTL no BCTL komprometidu atu informa ba públiku.

“Liu husi meiu ne’e atu moderniza reforma fiskál liu husi sistema pagamentu, impostu online ba prosesu administrasaun”, tenik Monica.

Iha fatin hanesan, Vise-Ministra Finansa, Sara Lobo Britas, reforsa atu moderniza sistema pagamentu, Autoridade Tributária hahú dezenvolve sistema pagamentu impostu atu hadi’a mekanismu pagamentu.

“Espera iha tempu badak Autoridade Tributária sei servisu hamutuk ho BCTL no banku komersial sira seluk hodi bele konklui, nu’uné ita bele halibur malu fila-fali hodi hala’o lansamentu ba públiku”. dehan governante ne’e. Apm

Leave a Reply

Your email address will not be published. Required fields are marked *