Vítima Dezastre Naturál 17 iha Same Hetan Apoiu Husi DNJRD

Fahe Tutan

Naunil Media (Manufahi), Kuarta (07/10) ne’e,Diresaun Nasionàl Jestaun Risku Dezastre (DNJRD) hamutuk ho autoridade Munisípiu Manufahi distribui ekipamentu ba vítima dezastre natural uma kain sanulu resin hitu (17).

Ekipamentu ne’e, direitamente entrega husi reprezentante Diretór Diresaun Nasionàl Jestaun Risku Dezastre (DNJRD), Serafin Da Costa, hamutuk ho Administardór Munisípiu Manufahi, Arantes Isaac Sarmento. Komunidade sira mak hetan apoiu kompostu husi postu haat (4) hanesan postu Same uma kain sanolu resin haat (14),  postu Alas ida (1), postu Turiskai uma kain ida (1) no postu Fatuberliu uma kain ida (1).

Reprezentante Diretór Nasionál Jestaun Risku Dezastre, Serafin Da Costa, hateten ajudus ne’e atu ajuda vítima sira dezastre naturál husi ahi han uma no anin sobu uma.

“Ami implementa iha 13 munisipiu, kuaze tres mill resin mak responde ba maluk vítima mak afeta ba risku dezatre, tanba ne’e husu ba autoridade munisípiu atu nafatin monitoriza ba programa ida ne’e”, Serafin Da Costa, ba jornalista sira iha edifísiu Risku Dezastre postu Same.  

Nia mos alerta autoridade sira munisípiu nian atu halo kontrolu ba iha material hirak mak distribui ona ba vítima sira.

“Tenke rezistu ba programa ida ne’e,  no uma hirak mak prontu ona, hirak mak sei iha hela prosesu konstrusaun no hirak mak seidauk, hirak mak seidauk hadia. Rezistu mos nain hirak mak fa’an material konstrusaun no keta halo hodi utiliza fali buat seluk, tenke rezistu mos, atu programa ida ne’e bele la’o ho ninia objectivu”, afirma nia.    

Administradór Munisípiu Manufahi, Arantes Isaac Sarmento, agradese ba Diresaun Nasionál Jestaun Risku Dezastre ho ninia ekipa ne’ebe fó ona apoiu benefisiariu sira ne’ebe mak lakon sira ninia sasan no uma husi ahi han no anin sobu.

“Orsamentu ne’ebe mak hodi hola material konstrusaun la’os osan husi munisípiu nian, maibe osan estadu nian, husu ba maluk benefisiariu sira tenke utiliza material konstrusaun hodi hadi’ak uma”,  tenik Arantes.

Ekipamentus konstrusan mak distribui ba kada uma kain, hanesan semente saka rua nulu resin lima (25),  Kalen tahan lima nulu (50), pregu 7 sente Killo haat (4) prego 10 senti killo rua (2), Prego 12 senti kilo rua (2), Besi 8 Milli 10 Batan, inklui arame fiu rolu rua (2). Nfm

Leave a Reply

Your email address will not be published.