KOMFINAMENTU OBRIGATORIU SALVA POVU HUSI COVID-19
Naunil media(Dili), Ministra Saúde (MS), Odete Maria Freitas Belo hateten, konfinamentu obrigatoriu (KO) maka salva povu husi surtu Covid-19 no Variante delta, tanba lakohi povu mate barak.
Tuir Ministra Saúde (MS), iha reuniaun Konsellu Ministru ne’ebé relasiona ho pedidu husi Ministériu Saúde, atu aplika Konfinamentu Obrigatóriu ba Munisipiu Dili, tanba hakarak salva komunidade sira husi surtu Covid-19 ne’ebé nafatin fó ameasa ba Timor-Leste.
“Membru Governu ami iha diferente ideias, ha’u hanesan Ministra Saúde, ha’u hakarak atu aplika Konfinamentu Obrigatóriu, hare’e ba situasaun ami-nian katak, kama mamuk laiha ona, pesoál saúde sira mós moras, tanba ne’e ha’u kontra ha’u-nia kolega Ministru sira, atu aplika Konfinamentu Obrigatóriu, ha’u lakohi ha’u nia ema atu mate, lakohi ha’u nia komunidade atu mate,”dehan Ministra Saude Odete ba jornalista sira, iha Salaun Ministériu Finansas, Aitarak Laran, Sabadu (04/09)
Ministra hatutan, sei la aplika serka Sanitária ho Konfimantu Obrigatóriu maka sidadaun barak sei mate tanba Covid-19 ho variante Delta, nune’e Governu diside hamutuk hodi aumenta KO to’o loron 9 fulan ne’e.
“Se Ministru sira lakohi atu aplika konfinamentu Obrigatóriu akontese maka komunidade sei mate barak , kuandu mate sei husu Ministru hotu-hotu nia responsabilidade sira.
Ami aseita hamutuk komfinamentu obrigatoriu aumenta to’o loron 9 Setembru, maibé ha’u nia hakarak bele karik aumenta tan semana rua atu nune’e, Ita bele hakotu transmisaun, tanba transmisaun sei la’o ne’e impaktu husi transmisaun Ida primeru ne’e”, MS esplika.
Tuir dadus aktual husi sentru Integradu Jestaun Krize-Sala Situasaun (SIJK-SS Sigla portuges), haree ba Munisipiu sira ne’ebé maka afetadu kazu foun Kazu foun ohin hamutuk 89, iha Dili 39, Covalima 22, Lautem 11, Baucau 8, Munisipiu Seluk 9, husi total kazu detetadu foun ohin 48 (54%) maka sintomátiku. Husi kazu detetadu foun ohin 20 (22%) simu ona vasina kompletu, 7 (8%) simu ona vasina doze dahuluk, kazu Rekuperadu (253), Kazu ativu (4.261), total komulativu kazu komfirmadu 17.468, obitu ne’ebé relata ohin 4. Ipe
