Komunidade Aldeia Uatulia-Ana iha Baucau Inisiativa Loke Esdrada Foun
Naunil Media (Díli), Komunidade husi Aldeia Uatulia-Ana, Suku Futulia, Postu Administrativu Venilale, Munisípiu Baucau iha inisiativa rasik hodi loke (ke’e) Estrada foun atu fasilita sira (komunidade) bele lori produtu lokál ba fa’an iha merkadu nomos bele asesu ba ambulansia bainhira situasaun emerjénsia no nesesidade seluk-tan.
Inisiativu loke estrada foun ne’e, komunidade kompostu husi joven feto-mane, inan-aman hamutuk ho autoridade lokál suku Fatulia nian, sira ke’e Estrada ho de’it emxada no ai-suak no matriak seluk ne’ebe tenke uza fíziku mak barak-liu.
Komunidade sira ke’e Estrada foun ne’e kilometru haat (4) liga entre aldeia Uatulia-Ana ba suku Fatulia.
Xefe suku Fatulia, Angelino Moises Pereira, hatete ke’e estrada tamba durante tempu okupasaun Indonézia to’o Timór ukun-an, sira komunidade sira la asesu ba estrada.
“Desde uluk kedas, ita-nia komunidade sira susar atu transporta produtu lokál hanesan haree, batar, feuk no talas hodi asesu ba merkadu, tanba laiha Estrada, komunidade Uatulia-Ana dala barak lalin de’it produtu lokál husi to’os ba uma no ba merkadu. Nune’e komunidade sira fó hanoin hamutuk katak di’ak liu agora karreta barak, atu habadak ita-nia ain bele lori sasán ba merkadu no bá uma, diak- liu ita ke’e estrada”, Xefe suku Fatulia, Angelo Moises Pereira, ba Naunil Media iha Licedere, Kuarta (09/07).
Xefe suku Fatulia Angelino hatutan, estrada ne’ebé komunidade ke’e bainhira iha tempu udan bee estraga hela de’it, kondisaun ladi’ak tanba bee sobu bei-beik. Maibé ho inisiativa komunidade nian bele ajuda ona komunidade hodi transporta produtu ba merkadu.
Nia esplika, estrada mak komunidade sira ke’e ne’e kilómetru 4, estrada luan metru 2.
“Ha’u nu’udar autoridade iha responsabilidade atu bele buka kanál informasaun ba iha parte kompotente sira. Nune’e bele tau konsiderasaun, ami-nia estrada ne’ebé mak ami ke’e rasik ho liman. Ha’u husu ona ajuda ba Ministériu Obras Publikas (MOP) hodi ajuda ekipamentu pezadu ba ke’e suvida sira, maibé sira hatán dadaun ne’e la iha orsamentu hodi ajuda”, haktuir xefe suku ne’e.
Estrada foun ne’e ke’e husi komunidad husi aldeia Uatulia-Ana totál uma-kain 172. Estrada ne’e sira ke’e husi fulan Maiu no finaliza ona iha fulan Juñu tinan 2020. Pau
