Setembru 2020, PNTL Rekoilla Koima Infrasaun Trânzitu $32.480
Naunil Media (Díli), Komandante Jerál Polísia Nasionál Timor-Leste (PNTL), Komisáriu Fautino Da Costa, informa PNTL liu husi unidade trânzitu rekoilla koima $32.480 ba kofre estadu, hafoin halo check point (pasa revista) ba transporte públiku no priva (motor no kareta) durante fulan Setembru tinan 2020.
“Durante halo check point iha fulan Setembru rejista total 1.355 husi infrasaun, prega multa ba motorista sira no transporte sira seluk ne’ebé la iha dokumentu inklui karta kondusaun. PNTL rekoilla koima montan $32.480 hatama ba kofre estadu”, relata Komandante Jerál PNTL, Komisáriu Fautino Da Costa, ba jornalista sira hafoin audensia ho Prezidente Repúblika (PR), Francisco Guterres ‘Lú Olo’, iha Palásiu Prezidensial Nicolau Lobato, Bairu Pité, Kinta (08/10).
Komisáriu Fautino Da Costa, hatete situasaun jerál semana dahuluk fulan Outobru teritórriu laran la’o diak, só asidente sira mak akontese iha fulan Setembru hamutuk 123.
“Atuliza asidente 123 iha fulan Setembru nian, asidenti roda viarias rezulta ema nain sanulu (10) mate no nain-38 kanek todan. Nune’e asaun polísia halo check point, PNTL liu husi unidade trânzitu rejista 178 no identifika infraessoens 1.355”, esplika Komisáriu Faustino Da Costa.
Durante audensia, Komisáriu Faustino Da Costa relata ba Xefe Estadu Timor-Leste, kona-ba situasaun jerál seguransa iha teritóriu timor laran.
“Ami atualiza liu-liu kona-ba kazu sira, hanesan kazu omesidiu iha Laklo, ida kanek todan, kazu iha Manufahi, no agora dadaun sai viral iha media sosial ema baku estudante Cristal mesak minoridade de’it”, dehan komandante jerál PNTL. Pau/Emj9
