İmportasaun Tama Sesta Bázika, Akademista Konsidera Governu Anterior Failla Iha Setór Agrikultura
Naunil Media (Díli), Akademista husi Universidade Nasionál Timor Lorosa’e (UNTL), atual vise dekanu estudantil Fakuldade Siensias Sosiais, Bernardo Idalina Leto, hateten programa sesta bázika priense ho ai-han importasaun, ne’e konsidera Governu anterior failla iha setór Agrikultura.
Tuir akademista Bernardo Idalina Leto, implementa programa sesta bazíka Governu deside foti ai-han importasaun ne’e la’os halo rekoperasaun ekonómia rai-laran maibé ajuda halo rekoperasaun ba hahan importasaun.
“Objetivu prinsipal mak halo rekoperasaun ba ekonómia osan ne’e labele sai ba rai liur no atu motiva agrikultura sira badinas nafatin atu kuda ita nia produtu lokal, nune’e liu husi programa sesta bazíka sira hola fila-fali ba povu, maibé foin iha faze implementasaun iha fulan tolu de’it hahan lokal hotu ona. Ha’u nia hare’e , Governu anterior ne’e failla iha setór agrikultura”, Akademista UNTL ne’e, ba jornalista Naunil Media iha nia kna’ar fatin Resintu Kampus Lama Kaikoli, Segunda (08/02).
Akademista ne’e husu ba governu aktual, tenke halo reflesaun ba problema sira hanesan ne’e, sei iha posibilidade tinan rua ka tolu sei krize ba ai-han lokal.
Nia sujere Governu apela ba povu tomak ne’ebé mak seidauk hetan programa sesta bazíka prolonga programa ne’e, nune’e agrikultura sira bele kuda fali ai-han depois mak programa ne’e kontinua fali. Ivo