Traballadór Timor Oan Iha Korea Sul-Australia Lada’uk Afeitadu Corona Virus
Naunil Media (Díli), Sekretáriu Estadu ba Formasaun Profesionál no Empregu (SEFOPE), Julião da Silva, hateten maske Korea Sul no Australia núdar nasaun afeitadu ba pandemia moras corona virus (COVID-19), maibe dadaun ne’e traballadór timor oan sira mak servisu iha país rua ne’e, sira kontinua livre no lada’uk afeitadu hosi virus refere.
“Traballadór timor oan sira ne’ebé servisu iha Korea Sul no Australia, sira kontinua livre no seida’uk afeitadu hosi COVID-19”, informa Sekretáriu Estadu, Julião da Silva, ba jornalista sira iha Palásiu Governu, Tersa (31/03).
Governante ne’e relata, daudaun ne’e traballadór timor oan rihun tolu resin mak servisu iha Korea Sul no rihun ida mak iha Australia. Traballadór sira kontinua kompri regulamentu no orientasoens ne’ebé fó sai hosi médiku sira iha ne’eba (Korea Sul-Australia) hodi prevene aan hodi corona virus.
“Husu ona ba adidu atu bele asegura ita nian sidadaun sira, atu virus ne’e labele afeita”, haktuir membru governu konstitusionál da-ualu ne’e.
Nia husu ba traballadór sira atu nafatin kuidadu aan, liuhosi kompri regulamentu no rona orientasaun ne’e iha Korea Sul no Australia, hodi hein desizaun tuir mak ne’ebe governu Timor-Leste sei hola, tanba sistema saúde iha nasaun rua (Korea Sul-Australia) di’ak tebes.
“Husu ba traballadór sira labele sai ba fatin arbiru e liliu ba sidade ne’ebé afeitadu. Tenke kuidadu aan no kontinua utiliza ekipamentu ne’ebe médiku sira fó sai atu proteze aan”, sujere governante ne’e.
Enkuantu antes ne’e Ministru Negosius Estranjeirus no Koperasaun (MNEC-Sigla Português), Dionísio da Costa Babo Soares, hateten embaixadór Timor-Leste iha Korea Sul hamutuk ho adidu traballadór kontaktu ona traballadór timor oan sira atu kuidadu aan. Mcr
