Lere Rekuiñese TL Laiha Rekursu Kontrolu Liña Fronteira Terestre

Fahe Tutan

Naunil Media (Díli), Xefe Estadu Maiór Jenerál FALINTIL Forsa Defeza Timor-Leste (F-FDTL),  Maijór Jenerál Lere Anan Timur, hateten la iha rekursu mazimu hodi halo kontrolu ba liña fronteira sira.

“Ita nia fronteira terestre ne’e luan no ita laiha kapasidade atu halo kontrolu ba ema hirak ne’ebé tama illegal”, hateten Lere Anan Timur ba jornalista sira hafoin enkontru semenál ho Prezidente Repúblika iha Palásiu Presidensiál Bairro Pité, Kuarta (01/04).

Eis Gerileiru Komandante Rejiaun Um Ponta Leste, hatutan ho limitasaun rekursu oioin ne’ebe Timor-Leste infrenta, tenke iha kontribuisaun komunidade no autoridade lokál sira iha liña fronteira sira nian importante atu garantia seguransa iha fronteira terestre.

“Ita labele konta de’it militar nomos polísia hirak iha fronteira, maibe komunidade no autoridade lokál sira mos tenke kontribui”, hatutan Lere

Veteranu durante tinan 24 ne’e husu ba komunidade  no autoridade sira atu servisu hamutuk ho seguransa nasionál hanesan Polísia no F-FDTL hodi halo kontrolu ba komunidade hirak ne’ebé tama sai ilegál hosi liña fronteira terestre.

Tuir dadus hahu hosi fulan Marsu kuaze servisu seguransa kaptura sidadaun Timor oan balun ne’ebé tama ilegál  hamutuk nain 55 inklui sidadaun Indonezia nain 4, sidadaun hirak ne’e maiória hosi Munisipiu Bobonaro, Kovalima nomos Oe-Cuse.Dms

Leave a Reply

Your email address will not be published.