PR Lú Olo Husu PNTL Hadi’ak Servisu Atuasaun Iha Tereinu
Naunil Media (Díli), Prezeidente Repúblika (PR), Francisco Guteres ‘Lú Olo’ husu ba Polísia Nasionál Timor-Leste (PNTL) atu hadi’ak servisu atuasaun iha terenu durante periódu estadu emerjénsia, tanba nune’e labele hamosu dezkontente no preokupasaun hosi komunidade sira.
Komandante Jerál PNT, Komisáriu Faustino da Costa, haktuir ba jornalista sira hafoin sorumutuk semanal ho Xefe Estadu Timor-Lesrte ‘Lú Olo’ iha Palásiu Prezidensiál Nicolau Lobato, Bairro Pité, Kinta (02/04).
“Prezidente Repúblika husu ba Komandu atu hadi’ak naksalak sira ne’ebé akontese durante atuasaun PNTL nian iha terrenu. Ami mos rekuiñese, preokupasaun balun hosi komunidade kona-ba atuasan polísia nasionál nian durante estadu emerjénsia hosi inísiu to’o agora”, haktuir Komandante Jerál PNTL, Komisáriu Faustino da Costa.
Komandante Jerál PNTL hatutan, naksalak sira akontese iha terenu tanba orientasaun komandu nian fó-sai antes molok aprovasaun dekretu governu kona-ba medidas implementasaun estadu emerjénsia.
“PNTL sei halibur komandante sira hosi munisípiu hotu no RAEOA atu halo avaliasaun ba implementasaun Estadu Emerjénsia ne’ebé hahú hosi 28 Marsu 2020. Diretivas ou Orintasaun balun hasai antes dekretu governu númeru 29/2020 kona-ba Dekretu Estdu Emerjénsia. Orientasaun ne’e ami tenke ajusta tuir dekretu ida nee”, hatutan Faustino.
Nia informa, PNTL instala ona Sekretariádu Komandu Operasaun Konjunta hanesan haktuir iha Dekretu Governu ne’ebé aprova iha 28 Marsu.
“Prezidente Repúblika deklara Estadu Emerjénsia ba prevensaun corona virus durante fulan ida, hahú husi 28 Marsu 2020. Atuasaun PNTL iha terrenu hatudu katak la tuir Dekretu Governu ne’ebé aprova iha Konsellu Ministru, hanesan sentru komérsiu sira ne’ebé tuir loloos la taka, maibé PNTL no F-FDTL obriga taka ba públika, haketak fen ho laen labele la’o hamutuk” tenik Nia
Komandante Jerál PNTL ne’e informa mos, relasiona ho COVID-19, governu Indonézia hahú taka nia fronteira terestre hahú 1 Abril 2020, obrigadu sidadaun Timor-Leste tama mai territóriu liuhusi dalan ilegál. Dms
