FEATUREDIkus LiuNewsPolitika

Governu Define Estrutura SIGC Kombate COVID-19

Fahe Tutan

Naunil Media (Díli),  Primeriu Ministru (PM), Taur Matan Ruak, hateten situasaun estadu emerjénsia ne’e governu difene ona estrutura ba Sentru Integradu ba Jestaun Krize (SIGC-Sigla Portugs) no establesementu seguransa fó apoiu tekniku ba kombate corona virus (COVID-19).

Primeiru Ministru (PM) Taur Matan Ruak, haktuir, loron 31 fulan Marsu 2020, asina Diploma Ministerial n.14/2020, loron 31 fulan Marsu, kona-ba estabelesimentu Sala Situasaun hosi Sentru Integradu ba Jestaun Krize, tuir lei n.o 2/2010, loron 21 fulan Abril, Lei Seguransa Nasionál, hodi kria CIGC nu’udar órgaun espesializada asesória no konsulta ba kordenasaun téknika operasionál ba entidade sira ne’ebé iha Sistema Integradu Seguransa Nasionál.

“Dispostu iha n.o 2, artigu 38.º hosi Lei n.o 2/2010, loron 21 fulan Abril, CIGC bele funsiona hanesan Sala Situasaun iha kazu exesaun konstitusionál ne’ebé previstu iha lejizlasaun Estadu de Sítio ka Estadu Emerjénsia. Durante Estadu Emerjénsia, CIGC sei funsiona nu’udar Sala Situasaun ho kompeténsia sira hanesan presta apoiu téknika ba Komisaun Interministeriál ne’ebé estabelese ona, kordena no monitoriza ezekusaun forsa tarefa sira, akompaña ba evolusaun sitasaun, trata informasaun hotu-hotu ne’ebé fó hosi serbisu kompetente, elabora estudu no proposta ho determinasaun hosi Komisaun Interministerial, presta akonsellamentu ba asuntu relasionadu  no ezekuta tarefa sira ne’ebé determina ona hosi Komisaun Interministerial”, Xefe governu konstitusionál da-ualu, Taur Matan Ruak, ba jornalista sira iha Centro de Convençõas de Díli (CCD), Kinta (02/04).

PM Taur explika, Sala Situasaun organiza ba iha unidade 8 mak hanesan komandu operasionál, estadu maiór kordenadór, forsa tarefa (liña ministeriál sira) ba prevensaun no mitigasaun pandemia COVID-19, kordenasaun ofisiál ligasaun ba forsa tarefa sira, ekipa estudu no análize ba risku, sekretariadu ba administrasaun no finansas, destakamentu reasaun rápida no unidade informasaun públika.

“Atu funsiona Sala operasaun ne’e Primeiru Ministru mós halo despasu ida, númeru  015/PM/III/2020, hodi nomeia estrutura sira hanesan tuir mai” Nia akresenta.

Entretantu Estrutura CIGC hamutuk nain 10 mak hanesan Brigadeiru Jenerál, João Miranda ‘Aluk’, atual Diretór Sentru Integradu ba Jestaun Krize (CIGC) nu’udar 2º Komandante Operasionál, Kapitaun Mar e Guerra, Pedro Klamar Fuik atual Diretor IDN, nu’udar Estadu Maór Kordenadór, Sérgio Lobo, Eis Ministru Saúde, nu’udar Kordenadór ba Forsa Tarefa ba Prevensaun no Mitigasaun ba Pandemia COVID-19.

Eis Primeiru Ministru VI governu no eis Ministru Saúde governu,  Rui Maria de Araújo, asumi kna’ár  Kordenadór Ligasaun Ofisiál ba Forsa Tarefa, eis Sekretáriu Estadu Seguransa Francisco Guterres,  nu’udar Kordenadór ba ekipa Estudu no Análize Risku, eis Ministru Negósiu Estranjeiru no Kooperasaun Aurélio Guterres, nu’udar Kordenadór Destakamentu Reasaun Rápida.

Gabinete Primeiru-Ministru Dionísio Santos  nu’udar Kordenadór Administrasaun no Finansas, Prezidente Tatoli.IP José da Costa, nu’udar Kordenadór ba Unidade Informasaun Públika,  Xefe Gabinete Primeiru-Ministru Afonso Henriques Corte-Real nu’udar Ligasaun Ofisiál ba Komandu Operasionál (Primeiru-Ministru) no asesór jurídiku Gabinete Primeiru-Ministru nian Nuno Machado Reis  nu’udar Asesór Jurídiku ba Sala Situasaun.

Atuál Primeiru-Ministru Taur Matan Ruak asumi kna’ár hanesan komandante operasionál ba Sala Situasaun hosi Sentru Integradu ba Jestaun Krize nian. Ana

Leave a Reply

Your email address will not be published. Required fields are marked *