Jornalista La’ós Besi Asu, Tenke Proteje-án Hosi COVID-19

Fahe Tutan

Naunil Media (Díli), Konsellu Imprensa (CI-Sigla Português) preokupa ho servisu jornalista sira nian iha terenu durante periódu estadu emerjénsia ba kombate corona virus (COVID-19).  

Preokupasaun ne’e hato’o hosi Prezidente Konsellu Imprensa, Virgílio da Silva Guterres, liuhosi konferensia imprensa iha edifisiu CI Kintal Bo’ot, Kinta (02/04).

“Liuhosi medida ne’ebé ita nia estadu fó ona hanesan distánsia sosiál, fase liman ho sabaun ne’e importante tebes, jornalista sira mos tenke haree ba fatin ne’ebé atu halo konferensia de imprensa no hetan deklarasaun ruma, jornalista sira kontinua manten iha ne’eba, maibé iha fatin hirak ne’ebé mak governu la prepara kondisaun ruma entaun jornalista tenke hato’o protestu no husu se fatin hirak ne’e mak la garante entaun jornalista sira bele retira”, hateten Prezidenti CI.

Prezidente CI Virgílio da Silva Guterres, husu ba jornalista sira atu proteje-an no nafatin servisu la’o tuir kode étika jornalizmu hodi identifika ba ema ne’ebé infeitadu covid-19.  

“Haree esperensia iha nasaun Italia ho España, COVID-19 hamate ona jornalista balun tanba jornalista sira ba halo konsulta iha hospitál pesoál médiku la atende ikus mai jornalista sira tenke mate. Jornalista tenke proteje án, no hala’o servisu la’o tuir nafatin kode etika jornalizmu hodi identifika ema ne’ebé infetadu covid-19”, Tenik Prezidente Virgílio da Silva Guterres.

Pandemia moras corona virus (covid-19) ohin loron sai ameasa bo’ot ba ema nia moris, maibe la hamate vontade jornalista sira timor oan no nafatin halo kobertura hodi garante direitu públiku kona-ba informasaun tuir konstituisaun repúblika demokrátika hateten ona. Jjf

Leave a Reply

Your email address will not be published.