Eis-PPN Arão Kontra Ezbosu Lei Kriminaliza Difamasaun

Naunil Media (Dili), Eis-Prezidente Parlamentu Nasionál (Eis-PPN) atual deputadu bankada Kongresu Nasionál Rekonstrusaun Timor (CNRT-Sigla Português), Arão Noé de Jesus da Costa Amaral, hateten kontra ezbosu lei kriminaliza difamasaun ne’ebe prepara husi Ministru Justisa Manuel Cárceres, tanba sei  hamate liberdade imprensa no espresaun.

“Ha’u kontra prinsipiu ida ne’e tanba hamate demokrasia no hamate mos ema nia liberdade espresaun no imprensa, maibé ne’e tenke tuir ona gostu mak ukun”, Eis-PPN atual deputadu bankada CNRT, Arão Noé de Jesus da Costa Amaral,  ba jornalista sira iha Parlamentu Nasionál, Kinta (16/07).

Tuir Eis-PPN atual deputadu bankada CNRT, Arão Noé, líder ruma sente prejudikadu bele halo keixa iha kodigu sivil no presiza kriminaliza difamasaun.

“Lei refere deskute iha tinan kotuk kona-ba atu muda lei difamasaun ida ne’e ba iha kodigu penal, maibé depois de ida ne’e lei muda fali ba iha kodigu sivíl. Agora ita atu muda fali lei kodigu penál hodi konsidera hanesan krime públiku ne’e  katak ita komesa  proibi ona ema nia liberdade espresaun”, haktuir Deputadu Bankada CNRT ne’e.

Reprezentante povu iha Uma Fukun Parlamentu Nasionál, Arão, dehan karik Governu aprova duni ezbosu lei refere, ba future bele iha-tan prizioneiru sira polítiku.

“Ha’u la-konkorda atu introdúz lei ba iha kódigu penal, kona-ba artigu ida difamasaun ne’e ba krime”, Tenik Arão.

Ikus-liu, Arão, dehan “Se prosesu demokrasia ita tau ona kriminaliza difamasaun entaun ita taka ona ema nia  direitu espresaun no imprensa, ne’e mak ita limite tiha nasaun la’os demokratiku ona”. Uar