PM Taur Garante TL La Mate Ba Hamlaha
Naunil Media (Díli), Primeiru Ministru Taur Matan Ruak garante povu Timor-Leste sei la mate tanba hamlaha durante periódu Estadu Emergensia.
Xefe Órgaun Ezekutivu, Taur Matan Ruak, ba jornalista sira iha Centro de Convenções de Díli (CCD), Segunda (06/04).
“Primeiru iha situasaun hanesan ne’e tenke han natón, par envez ita hanoin corona ba hanoin fali hahan, segundu hau hanoin ita labele mate ba hamlaha ona, tanba ami uluk tinan 24 iha ai-laran la mate ona ba hamlaha, tanba saida mak agora tenke mate ba hamlaha”, hateten PM Taur.
Xefe governu konstitusionál da-ualu ne’e hatutan, uluk sei iha situasaun defisil la mate ona ba hamlaha, agora Timor-Leste sai tiha ba estadu no nasaun tanba sa mate fali ba hamlaha, fira katak sei la mate ba hamlaha.
“Kona-ba Stock fos la iha problema, apelu ba sidadaun hotu han natón, se loron bailet bele han hanesan ramelau, maibe agora labele ramelau no ita labele haree de’it ba fós, maibe tenke haree mos ba fehuk, kumbili no seluk tan par han”, deha Taur.
Antes nee prezidenti konselu admistrasaun Sentru Lojistika Nasionál (CLN-Sigla Português), Agusto Junior Trindade, hateten fós rai iha armajen CLN nian iha Tibar hamutuk tonelada 376 atu responde ba situasaun emerjénsia iha rai laran, maske importasaun la mai ona Timor tamba inpaktu hosi surtu Corona Virus. Nasaun importadór sira hanesan Vietnam no Tailandia, dadaun nee taka ona nia produtu hodi exporta ba nasaun sira seluk. Uar
