Dr. Daniel Murphy Hakotu Iis Kauza Atakasaun Fuan

Fahe Tutan

Naunil Media (Díli), Tersa (14/04) ne’e maiz ou menus tuku 22:30 oras Timor-Leste (otl), Diretór Klínika Bairro Pité, Dr. Daniel Murphy hakotu iis iha ninia rezidensia Praia dos Coqueiros Díli.

Hafoin rona tiha novidade ne’e, Jestór Klínika Bairro Pité, Inácio dos santos, informa ba Naunil Media via telephone, katak matebian mate derepente de’it no laiha sintoma ba moras ruma.

“Horiseik Diretór Klínika Bairro Pité (matebian) sei fó konsulta hela ba pasiente sira mak mai halo tratamentu iha ne’e (klinika Bairro Pité), nia (Dr. Daniel Murphy) ho kondisaun mak di’ak hela,  maibé ohin  maiz ou menus tuku 22:30 otl, simu telefone hosi oan feto ne’ebé hela ho doutór, katak Doutór hakotu iis” informa Inácio.

Nia hatutan, antes hakotu iis, nia (matebiha dr. Daniel) telephone atu subtitui médiku balun hodi halo konsulta ba pasiente sira,tanba sente isin kolen no promote sei tama hikas servisu iha Kuarta (15/04).

“Entaun tuku 22:30 otl oan feto ne’ebé mak hela ho nia telefone ha’u katak doutór toba la book-án ona, entaun ha’u bá klínika ne’ebá telefone ambulánsia hosi nasionál mai ho ekipa médiku sira ami konsege ba nia residensia duni maibé doutór iis la iha ona”, jestór ne’e haktuir ho mata-wen.

“Durante sei moris, fundadór Klínika (matebian) sempre fó hatene atu hakoi nia (matebian dr. Daniel) iha areadór Klínika Bairro Pité nian, tanba nia (matebian dr. Daniel) rejeita atu lori fila nia isin mate bá nasaun orijén Amérika. Mezmu nune’e, hosi parte klínika sei kontaktu ba matebian nia família no oan na’in rua iha EUA hodi foti desizaun ikus”, konta tuir hosi jestór Klinika Bairro Pité.  

“Nia dehan mai ha’u, katak bainhira ha’u hakotu iis hakoi ha’u iha portaun klínika Bairo Pité para ema tama sai bele haree ha’u”  dehan Nia.

Doutór Daniel Murphy, hakotu iis ho idade 79, isin mate mate daudaun ne’e rai iha ninian rezidensia Praia dos Coqueiros Díli. Ana

Leave a Reply

Your email address will not be published.