KHUNTO Apoia PM Taur Retira Pedidu Demisaun
Naunil Media (Díli), Bankada Parlamentár Kmanek Haburas Unidade Nasionál Timor Oan (KHUNTO), apoia desizaun Primeiru Ministru (PM), Taur Matan Ruak ne’ebé dada ona ninia karta demisaun hosi Prezidente Repúblika (PR), Francisco Guterres ‘Lú Olo’.
“Kona-ba pedidu demisaun ne’ebé Primeiru Ministru retira fali ne’e la prevé iha lei, ne’e direitu sidadaun sira hatama mak dada fali mós ne’e direitu sidadaun sira nian. Ami (KHUNTO) mantein nafatin no kompri nafatin orientasaun hosi Primeiru Ministru, Taur Matan Ruak”, hateten membru bankada KHUNTO, Deputadu Luis Roberto, iha resintu parlamentu nasionál (PN), Tersa (14/04).
Atual vise daruak prrezidente parlamentu nasionál, Luis Roberto, hatutan kontinua tau konfiansa ba primeiru ministru Taur Matan Ruak hodi buka dalan ba prevensaun no kombate surtu COVID-19 iha Timor-Leste.
“Ita labele dehan apoia ou la apoia maibé haree ba situasaun agora ita tenke apoia duni hodi prevene moras COVID-19 ne’e. Sé moras ne’e laiha ita ko’alia buat seluk”. Dehan deputadu ne’e. Ana
