Kazu Konfirmadu Pozitivu COVID-19 Iha TL Aumenta Ba Nain 23

Fahe Tutan

Naunil Media (Díli), Liuhosi Sala Situasaun, Porta Voz Sentru Integradu Jestaun Krize (CIGC-Sigla portugs), Sergio Lobo, informa kazu konfirmadu pozitivu surtu COVID-19 iha Timor-Leste (TL) aumenta ba ema nain 23.

“Ohin loron nian, teste ne’ebé ita halo liuhosi laboratóriu hamutuk 361, hosi númeru ne’e iha kazu konfirmadu 23, aumenta ida kompara hanesan horiseik ba kazu ida iha Liquiça ne’ebé provável. Konfirmasaun mai hosi Darwin katak pozitivu”, informa eis Ministru Saúde, Sergio Lobo, ba jornalista sira liuhosi konferénsia imprensa iha Centro de Convençoões de Díli (CCD), Tersa(21/04).

Dr. Sergio Lobo, relata totál abitante sei iha kuarentena dadaun ne’e hamutuk 518, no sira ne’ebé sai ona hosi kuarentena hamutuk 101, hosi Díli ema 83, RAEOA ema na’in 17 no Ainaro ema na’in ida, enkuantu pasiente konfirmadu Corona Virus hamutuk ema 23 ho provável nain haat mak hala’o hela tratamentu saúde iha fatin izolamentu Sentru Saúde Vera Cruz.

“Agora dau-daun iha kuarentena aumenta tan uitoan tanba ema foun tama tan.  Iha ema nain 20 agora iha hela Ró laran, ema ida mak tama klandestinu agora iha hela Tibar, ita nia kolega Polisia ida mós tama kuarentena tanba nia iha kontaktu ka nia ba tula ema sira pozitivu ne’e. Apresia ho kapasidade ekipa médiku iha Laboratóriu Nasionál ne’ebé halo teste ba suspeitu COVID-19, tanba rezultadu fó sai hanesan de’it ho relatóriu ikus hosi Ospitál Royál Darwin Austrália”, tenik dr. Sergio Lobo.  

Antes ne’e, iha Segunda (20/04/2020) kazu konfirmadu COVID-19 hamutuk ema nain 22, negativu 208, suspeitu 327, hein rezultadu 92, provavel nain lima, no rekupera nain ida. Ana

Leave a Reply

Your email address will not be published.