PD Husu Governu Involve Xanana, Alkatiri no Ramos Horta Apoia Governu Kombate COVID-19

Fahe Tutan

Naunil Media (Díli), Bankada Parlamentár Partidu Demokrátiku (PD) propoin estabelese Konsellu Nasionál hodi envolve líder nasionál sira mak hanesan,  Kay Rala Xanana Gusmão, Marí Alkatiri no Ramos Horta hodi apoia asaun VIII Governu nian iha ámbitu prevensaun no kombate Corona Virus (COVID-19) iha Timor- Leste (TL).

“Envolvimentu mos líder nasionál sira hotu (Xanana, Alkatiri, Horta) nian hodi hola kna’ár lidera asaun sira ne’ebé mak governu planeia atu fó konfiansa hikas ba povu no hamutuk atu kombate moras Corona Virus. Bankada PD apresia serbisu voluntáriu, dedikasaun no abnegasaun ne’ebé Maun Bo’ot Kay Rala Xanana Gusmão halo, hodi mós tulun Governu iha nia asaun sira hotu”, xefe bankada parlamenta PD, António da Conceição ‘Kalohan’ liuhosi plenária Parlamentu Nasionál, Tersa (21/04).

Nia hateten, iha biban ne’ebé Konsellu-Ministru tetu hela atu aprezenta ba Prezidente Repúblika no Parlamentu Nasionál kona-ba planu atu estende Estadu Emerjénsia ne’e, bankada Demokrátiku hanoin katak, Indispensável tebes Governu envolve lideransa nasaun nian ne’ebé hahú halo serbisu hamutuk fó hikas garantia ba ita nia populasaun.

Haree ba propagasaun COVID-19 iha mundu, Timor-Leste mos lasees hosi situasaun ne’e. tanba ne’e, hakarak fó proposta konkreta lima (5) hanesan tuir mai ne’e.

1. Primeiru-Ministru nu’udar xefe ezekutivu lidera Governu nia asaun tomak ba planu emerjénsia, planu ne’ebé atu lori nafatin normál funsionamentu Governu nian.

 2. Primeiru-Ministru liu hosi Konsellu- Ministru hasai rezolusaun Governu nian ida atu estabelece Konsellu Nasionál hodi Kombate coronavirus no estabelesimentu planu Nasionál ida ne’e envolve líder nasionál sira Salvasaun Nasionál. Konsellu hanesan Maun Boot Kay Rala Xanana Gusmão, Jose Ramos Horta no Mari Alkatiri.

  3.Hosi kriasaun Konsellu Nasionál ida ne’e, Primeiru-Ministru tau fiar ba Maun Boot Kay Rala Xanana Gusmão, koordena atividade kombate surtu corona virus no serbisu asisténsia sosiál no mós atividade defeza no seguransa ligadu ba kombate surtu coronavirus no nia impaktu sosiál ekonómika.

 4. Primeiru-Ministru liuhosi Konsellu- Ministru nomeia Jose Ramos Horta hodi halo kampaña Internasionál mobiiza apoia internasionál nian hodi tulun Timor-Leste halo asaun ba kombate coronavirus no mós medida seluk hodi tulun rekupera atividade ekonómika país nian ne’ebé hatodan ona setór privadu iha tinan tolu nia laran.

5. Primeiru-Ministru liuhosi Konsellu Ministru define kna’ar espesífiku ba Marí Alkatiri atu hola parte hamutuk halo planu médiu prazu ho prioridade espesífiku ba dezenvolvimentu país nian ba tinan rua ne’ebé sei resta nu’udar planu konjunta Konsellu Nasionál ba kombate surtu coronavirus no salvasaun nasionál II”Proposta ida-ne’e Bankada Partidu Demokrátiku aprezenta hodi tulun Governu hala’o nia responsabilidade serbí nasaun no serbí povu.

“Proposta ida ne’e bankada demokrátiku aprezenta hodi tulun governu hala’o nia responsabilidade serví nasaun no serví povu. Nasaun presiza hakmatek no moris saudavel, moris diak no moris dignu, hasés interese grupu, tane-aas interese nasionál. Hanesan iha tempu funu Komandante sira husu atu povu rona lideransa sira, ha’u hanoin agora povu husu atu lideransa sira rona povu nia halerik”, Tenik Kalohan.  

Xefe Bankada PD mos husu ba bankada sira seluk atu asina proposta ne’e  hodi aprezenta ba Primeiru-Ministru, Taur Matan Ruak.

“Deklarasaun Partidu Demokrátiku ne’e, hetan autorizasaun hosi Prezidente PD, Mariano Assanami Sabino, Sekretáriu Jerál, António da Conçeição, Prezidente CPN, Adriano do Nascimento, Vise-Prezidente atuál deputada, Ernesto Fernandes “Dudu” no Prezidente PMD atuál Deputada Elvina Sousa Carvalho”. Dehan Nia.Ana

Leave a Reply

Your email address will not be published.