PN Fó Votu Pezár Ba Doutór Daniel Murphy

Fahe Tutan

Naunil Media (Díli), Tersa (21/04) ne’e Parlamentu Nasional (PN) aprova votu pezár ba diretór Klínika Bairro Pité, saudozu Doutór Daniel Murphy, ne’ebe fila hikas ona ba Aman Maromak nia kadunan santu.

Proponente ba votu pezár mai hosi xefe banka parlamentár Fretilin, Deputadu Aniceto Guterres, deputadu CNRT Partrocínio Fernandes dos Reis, deputadu Partidu Demokrátiku António da Conceição ‘Kalohan’, deputadu PLP Abel Pires da Silva no deputada Khunto Olinda Guterres.

Sesaun ne’e dirije hosi Prezidente Parlamentu Nasionál (PPN) Interinu no Atul Vise II Prezidente Partlamentu Nasionál, Luis Roberto. Rezultadu votu pezár ne’e a favor 55, kontra zero (0) no abstensaun zero (0).

Xefe bankada parlamentár Fretilin, deputadu Aniceto Guterres, hato’o sentida kondolensia kle’an ba família dr. Daniel Murphy.

“Ita bele dehan, dr. Daniel ne’e núdar médiku no ativista, tanba nia mai Timor servisu permanente ba kestaun saúde dezde 1998 iha situasaun ne’ebe Timor-Leste presija tebes. Nia mai iha situasaun ne’ebe sertu, Timor oan presija asistensia”, Aniceto informa liuhosi plenária parlamentu nasionál.

Tuir deputadu Aniceto katak, dr. Daniel merese hetan votu pezár hosi órgaun soberani hanesan Parlamentu Nasionál.

“Ohin sesaun plenaria parlamentu nasionál, nia merese hetan votu pezár, tanba nia fó ona kontribuisaun ba povu Timor-Leste iha tempu ne’ebe defisil”, tenik Nia.

Xefe Bankada PD, deputadu António da Conceição ‘Kalohan’, hateten dr. Daniel Murphy ninia kontribuisaun ba povu Timor-Leste maka’as tebes.

“Nia (saudozu dr. Daniel Murphy) mai iha situasaun ida que krítiku liu, tanba ne’e ita iha netik eroi ida hodi fó asistensia saúde ba Timor-oan. Nia merese ita hotu ninia solidaridade, Nia la’os fakar rán iha Timor maibe ninia solidariedade maka’as tebes iha Timor”, realsa Nia.

Deputadu PLP Abel Pires da Silva, hato’o senta kondolensia no husu ba família sira atu forsa nafatin.

“dr. Daniel mai iha tempu ne’ebe defisil tebes, iha kontekstu dr. Daniel nian vítima barak mak halai ba Nia (saudozu dr. Daniel), tanba iha tempu ne’ebá timor-oan sira tauk ba hospital governu nian, ida ne’e luta extraordinária ida’” rekuiñese deputadu hosi bankada parlamentár PLP ne’e.

Deputadu Olinda Guterres, hateten nia sai proponente ba proposta votu pezár ne’e tanba dr. Daniel ninian kontribuisaun parte saúde iha Timor-Leste bo’ot tebes no sura lahotu.

“Nia (saudozu dr. Daniel) iha kualker oras hodi fó atendementu saúde nian ba ita, tanba ne’e merese parlamentu fó votu pezár bad r. Daniel”. Dehan Nia. Apm

Leave a Reply

Your email address will not be published.