Komisáriu Mateus Rezeita Informasaun Membru PNTL Tuir Juramentu KHUNTO

Fahe Tutan

Naunil Media (Díli), Segundu Komandante Jerál Polísia Nasionál Timor-Leste (PNTL), Komisáriu Mateus Soares, deklara membru PNTL jura ba bandeira Republika Demokrátika Timor-Leste (RDTL) no Konstituisaun RDTL, la’ós jura ba Partidu Kamanek Haburas Unidade Timor Oan (KHUNTO).

“Hau fiar katak membru PNTL hotu-hotu hakruk ba konstituisaun. Karik iha evidénsia entre ami ruma mak jura ba partidu ruma. Entaun  tenke halo investigasaun mak ita bele haree, tanba buat ida deskomfia ne’e ita tomam ona, diak liu prova sirea mak ita haree”, Segundu Komandante Jerál PNTL, Komisariu Mateus Soares, ba jornalista sira, hafoin selebra asina MoU ho UNPAZ iha Sentru Formasaun Akadémia PNTL Komoro,  Kuarta (08/07).

Segundu Komandante Jerál PNTL, Komisariu Mateus Soares, hateten PNTL jura dala ida ba bandera RDTL no Konstituisaun RDTL la’ós jura dala rua.

“Polísia jura ba bandera RDTL  no ba konstituisaun. Sé kuandu membru balu mak jura ba seluk fali, nia mak tenke simu komsikuénsia, nia sei demite no sei sai sidadaun baibain”, afirma Segundu Komandante Jerál PNTL, Komisariu Mateus Soares.

Ikus-liu, Segundu Komandante Jerál PNTL, Komisariu Mateus Soares, dehan “Ita polítika sira deklara iha Parlamentu Nasionál ne’e hanesan motiva ida ba PNTL para fó atensaun diak liután ba polísia hodi la bele la’o ses, la’o tuir regras sira  ne’ebé fó ba PNTL no instituisaun PNTL la primite membru sira jura dala rua”. Pau

Leave a Reply

Your email address will not be published.