Governu Asina Akordu ho Parseiru ba Ajudu Fundu Programa Seguransa Ai-han
Naunil Media (Díli), Kinta (09/07) ne’e, Governu liu husi Ministériu Finansas asina akordu koperasaun ho parseiru sira, Banku Dezenvolvimentu Aziatiku (ADB-Sigla Ingles) no Programa Nasaun Unida ba Dezenvolvimentu (UNDP-Sigla Ingles) kona-ba finansiamentu seguransa ai-han iha Timor-Leste ne’ebe kauza husi Surtu COVID-19.
Akordu kopersaun ne’e, ADB sei fó asistensia fundu hamutuk millaun U$ 1 no UNDP U$ 105.335 hodi reforsa fundu Covid-19, liu-liu implement programa seguransa ai-han ba ema vulnerável sira.
Ministru Finansa, Fernando Hanjam, hateten akordu refere relasiona ho desizaun konsellu Ministru ne’ebe fó poder tomak ba nia (Ministru Finansa Fernando Hanjam) hodi asina akordu ajudu externu ba programa ai-han.
“Ministériu implementadór mak ita nian Minist’eriu Agrikultura no Peska ho UNDP atu implementa programa ne’e ho lalais tanba ninia dureasaun ba fulan neén deit”, hateten Ministru Finansa, Fernando Hanjam, hafoin selebra asina akordu ho parseiru sira iha Sala Auditóriu Xanana Gusmão, Aitarak Laran, Kinta.
Ministru Fernando Hanjam, esplika durante fulan ne’en nia laran mak la implementa, mak automatikamente osan ne’e sei fila, tanba ne’e presija kordenasaun di’ak entre Ministériu Agrikultura no Peska, UNDP atu ezekuta programa.
“Ajudu externu husi ita nia parseiru sira liu-liu iha ADB hodi asegura programa seguransa alimentar nian”, informa Governante ne’e.
Iha fatin hanesan Country Diretór UNDP iha Timor-Leste, Munkh Tuya Altangerel, hateten sei servisu hamutuk ho agrikultór sira iha munisipiu lima nune’e bele sosa direitamente produtu lokal ne’ebé produz ona.
“Iha implementasaun ne’e ami sei servisu hamutuk ho munisipiu lima, kada munisipiu ami sei hamutuk ho agrikultor sira, grupu agrikultor para ami bele sosa ai-han sira ne’e direitamente husi sira”. Dehan Country Diretór UNDP iha Timor-Leste ne’e. Apm
