COVID-19 : Jornalista Sira Timor Oan Nafatin Kompri Dever

Fahe Tutan

Naunil Media (Díli), Prezidente Asosiasaun Jornalista Timor-Leste (AJTL), Zevonia Viera, infórma maske Timor-Leste infrenta hela moras COVID-19, maibé jornalista sira nafatin kompri sira nia dever, halo kobertura iha terenu tuir kode etika jornalismu.

“Nu’udar jornalista iha dever importante ida maka tenke halo koberteura iha situasaun COVID-19. Ho responsabilidade hodi ajuda ita nia audénsia no leitór, no rona nain sira hodi labele pániku hodi hasoru moras ne’ebé dadaun hada’et ona mai Timor-Leste” hateten Zevonia ba jornalista sira iha Fundasaun Haburas, Domingo (03/05).   

Nia hatutan, jornalista hola papel ida atu eduka, oinsa audénsia labele fiar ba notisia falsu sira hosi media social.

“Importante tebes, ita jornalista iha dever hodi halo verifikasaun ba fóntes ne’ebé mak kredivél no mai ho dadus ne’ebé mak loos”, tenik Prezidente AJTL, Zevonia.

Tuir Zevonia katak, jornalista sira tenke hakerek informasaun ne’ebe bele ses hosi ema nia pániku.

“Se bainhira ema ne’ebé pániku ba ita nia infórmasaun sei bele hamosu moras seluk ba sira, tanba ne’e nu’udar asosiasaun fó hanoin ba jornalista sira atu hakerek notisia tenke tuir kode étika jornalismu nian no prinsipiu jornalista nian, balansu, lialoos, respeita ema nia privasidade. Ezemplu parte saúde nian katak labele fó sai ema ne’ebé sai vítima ba moras COVID-19 tanba bandu hosi kode étika Saúde nian”, tenik Zevonia.

Prezidente AJTL Zevonia husu nain ba media sira atu fo atensaun ba traballadór jornalista sira, liu-liu fó vensimentu ne’ebe ho dignu iha periodu estadu emerjénsia relasiona ho prevensaun no kombate COVID-19 iha Timor-Leste. “Direitu ba iha jornalisa sira hanesan sidadaun ida tanba ne’e, sira iha direitu atu hetan ninia vensementu ne’ebé maka justu dignu ba nia servisu fatin sira tanba servisu ne’ebé maka jornalista sira halo ne’e iha risku bo’ot ida no husu ba média nain, sira tenke proteze ninia jornalista sira ne’ebé hanesan ema professionál, atu nune’e labele sai vitima ba nia moris ekonomia”. dehan Nia. Jjf

Leave a Reply

Your email address will not be published.