FEATUREDIkus LiuNewsPolitika

PR Lú Olo: TL Iha Razaun Selebra Loron 5 Maiu

Fahe Tutan

Naunil Media (Díli), Prezidente Repúblika (PR), Francisco Guterres “Lú Olo” hateten Timor-Leste (TL), iha razaun selebra loron 5 fulan Maiu tanba, iha tinan 1999 iha Novaiorke, Portugál no Indonézia assina akordu iha ONU nia okos hodi implementa referendu.

Chefe estadu Francisco Guterres “Lú Olo” hato’o lia hirak ne’e liu husi mensajen relasiona ho loron 5 fulan Maiu nu’udar loron Lia Portugés ne’ebé komunidade hamutuk millaun 280 resin mak ko’alia hanesan Timor-Leste inklui CPLP, ne’ebé Naunil Média asesu iha Palásiu Prezidensiál Nicolau Lobato Bairru Pite, Kinta, (05/05).

“Ita nu’udar povu Timor-Leste iha razaun oioin atu selebra loron 5 Maiu: iha tinan 1999, iha Novaiorke, Portugál no Indonézia asina akordu ida iha ONU nia okos hodi implementa referendu ne’ebé fó dalan ba ita-nia Povu atu afirma dala ida tan, liuhosi votu, ninia hakarak atu sai livre no independente,” dehan Chefe estadu Francisco Guterres

PR hatutan durante tinan barak ona, CPLP selebra loron 5 Maiu nu’udar Loron Lia-Portugés no Kultura, iha tinan 2019 de’it mak UNESCO deside loron 5 Maiu sai hanesan Loron Mundiál ba Lia-Portugés, ne’e hatudu momoos katak lia-portugés hetan rekoñesimentu nu’udar lian globál, ho kapasidade atu dada no hamosu realidade foun hirak relasiona ho siénsia no teknolojia moderna.

“Haree ba ita-nia istória rasik no ita-nia pasadu ne’ebé dook tebes, Asembleia Konstituinte foti desizaun atu hatuur lia-portugés nu’udar lian ofisiál Repúblika nian. Haktuir ita-nia Konstituisaun, ita-nia Repúblika deklara ninia an nu’udar nasaun dalen-ruak ida, ho lian ofisiál rua: lia-tetun ne’ebé ema barakliu ko’alia (90% resin) no lia-portugés ne’ebé, maski ema uitoan de’it mak ko’alia, kontinua buras ba beibeik,” katak PR

Chefe estadu ne’e esplika ho globalizasaun ne’ebé mak ohin hasoru, tenke haree ba lia-portugés nu’udar vantajen ida ba jerasaun daudaun ne’e no jerasaun aban-bainrua nian. Nune’e, iha devér atu promove no prezerva dalen ida-ne’e nu’udar dalan di’ak ida atu kaer metin nafatin identidade kulturál, no mós nu’udar lian barani ida ne’ebé hala’o nafatin ninia knaar hodi marka diferensa iha Ázia no iha mundu tomak.

Lú Olo hateten lia-portugés kontinua buras babeibeik iha Timor-Leste. Tuir sensus ikus nian ne’ebé hala’o iha Timor-Leste, populasaun Timoroan hamutuk 30,8% resin ko’alia portugés. Ida-ne’e hatudu katak persentajen ema ne’ebé ko’alia lian ofisiál ne’e sa’e maka’as kompara ho 5% iha tinan 2002.* Jos

Leave a Reply

Your email address will not be published. Required fields are marked *