COVID-19: SAMES Distribui Ekipamentu Protesaun Ba Sentru Saúde Sira

Fahe Tutan
Naunil Media (Díli), Tersa (05/05) ne’e, Servisu Autónomu Medikamentu no Ekipamentus Saúde (SAMES) hahú distribui ona ekipamentu ba protesaun pessoál nian ba Sentru Saúde sira inklui Rejiaun Administrativa Espesiál Oe-Cusse Ambeno (RAEOA).
 
Diretór SAMES, Santana Martins, informa distribuisaun ekipamentu prevensaun COVID-19 mai hosi nasaun Xina nian ne’e nu’udar programa kontinuasaun ne’ebé antes ne’e halo ona. 

“Sasan sira ne’ebé ohin atu distribui ba munisípiu no RAEOA mak hanesan Personal Protect Equipment (ekipamentu ba protesaun pessoál), kompostu hosi oklu, luvas, maskra no ropa ba isin no sapatu nian” Informa Diretór SAMES ba jornalista sira iha areadór Edifisiu SAMES, Kampu Alor.

Nia informa liu-tan, distribuisaun ekipamentu sir aba protesaun ne’e bazeia ba planu ne’ebé SAMES servisu hamutuk ho Ministériu Saúde liuhosi Diresaun Nasionál Servisu Ospitalar no mós Diresaun Nasionál Farmasia Medikamentus  hodi define ho kuantidade ne’ebé iha no tenke halo distribuisaun.

“Ekipamemtu ida mak termu scanner, maibe kada sentru saúde tenke hetan ida, tanba distribuisaun ne’e rasik hahú kedas iha loron kinta to’o agora no ohin ekipa tékniku sira hahú halo mobilizasaun ba iha rejiaun ne’ebé mak SAMES define ona. Ekipa ida sei hahu hosi ne’e ba rejiaun leste hosi Hera, Manatutu, Baucau, Viqueque no Lautém. Ekipa ida seluk distribui hosi rejiaun rua hosi Aileu, Maubisi, Manufahi, Ainaru no ba Covalima no ekipa ida hosi Dili, Ermera, Likisá no Bobanaru to’o RAEOA”, esplika Nia.

Tuir nia, material hirak  ne’ebé Governu sosa iha hela prosesu ninia laran, tanba ne’e  presiza tebes tau atensaun no utiliza produtu sira ne’e tuir nesesidade.

“Tuir dadus ne’ebé mak dadaun SAMES iha sentru saúde hamutuk 70, inklui sentru saúde internamentu sira ekipamentus sira ne’e tuir saida mak SAMES análija bajeia ba ninia stok rasik iha armajen, ami kontinua preokupa se ita ninia sistema prevensaun ba oin mak menus ne’e bele la sufisiente ba ekipamentus ne’ebé dadaun halo hela distribuisaun”, tenik Nia

Diretór Interinu Saúde Rejional RAEOA, Luis de Jesus Neno, informa RAEOA simu ona ekipamentu ne’ebé SAMES distribui.

“Ami mai iha ne’e atu simu sasan ne’ebé mak atu lori ba RAEOA no hetan suporta hosi SAMES, liu-liu ba materiál hodi atende ba COVID-19. Sasan ne’e mak maskra no seluk tan ne’ebe mak ligadu ho atividade  COVID-19”. Dehan Nia. Uar

Leave a Reply

Your email address will not be published.