Solusiona Inserteza Polítika, CNRT Sujere PR Lú Olo Bolu Hamutuk Fretilin-CNRT

Naunil Medi (Dili), Partidu Kongresu Nasionál Rekonstrusaun Timor (CNRT-Sigla Português) sujere ba Prezidente Repúblika (PR), Francisco Guterres ‘Lú Olo’ atu hola pozisaun neutru hodi bolu hamutuk partidu bo’ot rua, Fretilin ho CNRT atu fó solusaun ba situasaun inserteza polítiku rai-laran.

Deklarasaun polítiku ne’e hato’o hosi Vise Xefe bankada Parlamentár, Patriocino Fernandes, ba jornalista sira liuhosi konferensia imprensa hala’o iha Bankada CNRT, Tersa (05/05).      

Vise Xefe bankada parlamentár CNRT, Patriocino Fernandes, hateten haree ba situasaun atuál polítika, kontinua la’o iha inserteza hodi hamate sirkulasaun ekonómia iha rai laran, tamba nee tempu ona CNRT ho Fretilin hamutuk hodi hakotu impase polítiku.

“Haree ba situasaun polítika rai-laran ne’ ebé kontinua iha inserteza, tanba mos partidu  politiku sira la sensivel ba povu nia situasaun moris no situasaun ekonómia pais nian. Esforsu hodi halo violasaun ba Konstituisaun Repúblika atu atinzi objetivu poder hodi ignora tiha konfiansa povu nian ne’ebé depozita ba partidu politiku iha Eleisaun Antesipada”, hateten deputadu Patrocino.

Deputadu Patrocino, hatutan “Nune’e maka, Bankada CNRT hola pozisaun polítika tuir mai ne’e : Primeiru, Bankada CNRT afirma apoiu tomak ba Prezidente Parlamentu Nasionál atu hola desizaun saida deit atu fó susesu ba implementasaun Estadu Emerjénsia.

Segundu, Nia tenik, konfiansa maioria povu iha Eleisaun Antesipada fo ba AMP, Bankada CNRT ho kadeira 21 no Fretilin.

“Tempu to’o ona atu halo tuir mandatu povu ne’ebé deposita nia-votu barak liu ba partidu-rua ne’e. Ami husu atu partidu bo’ot rua ne’e atu sira nia diferensa tau iha kotuk hodi haree deit interese povu nian”, realsa deputadu ne’e.  

Datoluk, vise xefe bankada CNRT ne’e husu ba Prezidente Repúblika atu hamriik hanesan xefe do estadu, hamriik iha klaran hodi hamutuk ho partidu bo’ot rua Fretilin no CNRT atu buka solusaun ba inpase politika.

Iha tempu hanesan, Xefe Bankada parlamentár Fretilin, Aniceto Guterres, hateten maske bankada CNRT nia opiniaun polítika mak nune’e maibé partidu Fretilin seidauk simu informasaun ruma hosi lideransa partidu polítiku, tamba desizaun hotu liuhosi líder partidu no  la’os mai hosi bankada.

“Deputadu sira liu-liu bankada hala’o polítika partidu nian, ne’e depende ba lideransa partidu ida-idak. Se nia hakarak hakotu impase polítika, la presiza dada naruk, mas ne’e diak liu nivel lideransa partidu mak kontaktu malu”. dehan Xefe Bankada Fretilin. Uar