PR Lú Olo Promulga Ona Orsamentu Jerál Estadu 2021
Naunil Media (Díli), Prezidente Repúblika (PR), Francisco Guterres Lú Olo, ohin, loron Segunda (28/12 /2020), promulga ona Dekretu Parlamentu Nasionál númeru 26/V Orsamentu Jerál Estadu ba tinan 2021.
Orsamentu Jerál Estadu (OJE) ba tinan 2021 nian hamosu alterasaun metodolójika balu neebé halo indikasaun kona-ba despeza sira tuir programa ida-idak nian, aleindé utiliza klasifikasaun orgánika (entidade neebé mak atu realiza despeza) no klasifikasaun ekonómika (tipu despeza neebé mak atu realiza).
Naunil Media Asesu Komunikadu liu husi pájina ofisial Presidência da República Democrática de Timor-Leste, Segunda (28/12/2020).
OJE hamosu previzaun orsamentál ba órgaun no servisu sira iha Setór Públiku Administrativu, kompostu hosi Orsamentu Administrasaun Sentrál, hosi Orsamentu Rejiaun Administrativa Espesiál Oe-Kusse Ambenu no hosi Orsamentu Seguransa Sosiál nian.
Durante tinan 2021, Governu hetan autorizasaun atu realiza transferénsia hosi Fundu Petrolíferu too montante dólar millaun 1.377,6.
Parlamentu Nasionál aprova Dekretu númeru 26/V Orsamentu Jerál Estadu ba tinan 2021, ho votu a favór 44, laiha votu kontra no laiha abstensaun iha loron 12 fulan-dezembru 2020. */Pau
