Pe Emanuel : Sesta Feira Santa Nu’udar Loron Refleksaun Ba Jesus Nia-Mate

Naunil Media (Viqueque), Loron Sesta feira santa hanesan loron ne’ebé sarani katolika iha mundu tomak inklui Timor-Leste selebra hodi hanoin hikas Nai Jesus Cristo nia-mate no moris hias iha kruz.

Relasiona ho loron ne’e ohin sesta, 02 fulan abril tinan 2021. sarani katolika husi estasaun kapela são Paulo Macadique, parokia Nosa Señora Do Rosario De Fatima halo selebrasaun hamutuk ho Padre Emanuel Rajamanu kwata SVD.

Iha selebrasaun ne’e lius husi Omilia Amu selebrante ne’e deklara loron sesta feira santa hanesan loron ne’ebé jesus Cristo Saran a’an ba mate hodi selu ema hotu nia sala.

“ São João Evangelista hakerek iha Evangellu Jo.15: 13 La iha domin bo’ot liu, domin ida ne’ebé saran nia-an ba mate, saran nia-an tomak ba ema seluk nia Vida. Entaun Kristu nia Misaun bo’ot maka haklaken salvasaun ba mundu no nia-mai atu hadame malu entre ita ho Maromak. Liu husi Kristu nia mate maka ita hetan moris, no liuhusi Kristu nia moris hias maka ita bele hetan salvasaun,” bibi atan ne’e esplika liu husi omilia iha misa Sexta feira Santa, iha rezidénsia Asamadu kapela Macadique, munisipu Viqueque (02/04/2021).

Bibi atan ne’e haktuir, Kruz maka sinal folin salvasaun nian. Nune’e nu’udar sarani katólika presiza selebra hodi hanoin hikas Jesus nia terus atu soi ema hotu.

“Krus maka sinál no folin salvasaun nian, Kruz la iha karik, Salvasaun mós la iha. Iha selebrasaun ne’e hanoin hikas Jesus Kristu nia terus no mate iha Kruz ne’e. ita mós hanoin ita-nia maun-alin sira hotu neebé hetan terus no susar oi-oin, ita-nia maluk sira neebé sei moras iha ospital, maluk sira ne’ebé moras no terus tamba situasaun difisil pandemia covid 19, sira neebé mate tamba Virus Corona, balun neebé terus iha kadeia, terus tanba funu, terus tanba hamlaha, terus tamba injustisa no terus oi-oin.
Bibi atan igreja katolika ne’e motiva, hanesan ema fiar nain, ida-idak tenke lori nia Kruz ho haksolok iha situasaun difisil nia laran”.

Nia hatutan, “Ita nu’udar ema fi’ar nain oinsá maka bele lori ita-nia kruz lor-loron nian, situasaun difisil. Karik dala ruma ita halai ses husi Kruz, lakoi lori ita-nia kruz, lakoi terus, ka dala ruma ita hetan terus karik halo oin triste, laran taridu neon la haksolok. Entaun ohin ita terus hamutuk ho Kristu iha situasaun difisil ida nee nia laran”.

Bibi atan ne’e dehan, nu’udar sarani katolika hateke ba krus Santa, ita ida-idak koalia iha nia fuan hodi hatoo Obrigado Wain Ba Jesus, Agradese ba Jesus nia sakrifisiu, tanba ha’u ema sala nain. Perdua ha’u nai, Perdua ha’u, kura ha’u Nai. Ita husu Nai Haraik mai ita kbi’it no pasiénsia atu bele Sakrifika an hodi servi ba malu iha moris lor-loron nian. Haraik espiritu matenek no laran luak mai ita atu hatene perdua ba malu, tulun malu, hatene halo sakrifisiu, nomós halo ita aten brani nafatin atu hadomi Maromak no maun alin sira ho laran tomak.

Iha omilia ne’e padre selebrante ne’e husu ba sarani katolika sira atu banati tuir dalan jesus nian hodi hetan salvasaun.

Partisipa iha misa ne’e mai husi Sarani katolika Balun husi estasaun kapela Macadique. RIT