FRETILIN, PLP no KHUNTO Keixa CNRT Ba MP
Naunil Media (Díli), Bankada Parlamentár Fretilin, PLP no KHUNTO hato’o ona keixa ba Ministériu Públiku (MP) hasoru deputadu sira hosi Partidu Concelho Nacionál de Reconstrução Timor (CNRT), invade meza parlamentu nasional iha salaun plenária no perturba funsionamentu normal parlamentu nian.
Nota Komunikadu ne’ebe Naunil Media asesu iha bankada Fretilin iha Parlamentu Nasional, hateten Vise Prezidente Parlamemtu Nasional nain rua, hamutuk ho deputadu nain lima, sira asina ona karta keixa ba Ministeriu Públiku hasoru deputadu sira hosi bankada CNRT.
“Ohin, loron-18 fulan-Maiu tinan-2020, deputadu nain lima hamutuk ho Vice Prezidente Parlamentu Nasionál nain rua, asina karta ida hodi hato’o keixa ba Ministériu Públiku hasoru deputadu CNRT sira, hanesan Maria Fernanda Lay, Virginia Ana Belo, Bendita Moniz Magno, Maria Gorumali Barreto, Maria Rosa da Câmara Bisoi, José Virgílio Rodrigues Ferreira, Maria Terezinha da Silva Viegas no Ricardo Baptista, ne’ebé halo áktu fíziku hodi perturba no impede parlamentu nasionál hala’o sesaun plenária”, haktuir nota komunikad.
Entrevista ho jornalista sira iha sala plenária Parlamentu Nasionál nian, Vise dahuluk Prezidente Parlamentu Nasionál, deputada Maria Angelina Sarmento deklara katak “asaun sira ne’ebé invade meza parlamentu, significa deputadu sira ne’e komete krimi ida ne’ebé impede funsionamentu normal Vice Prezidente sira nian atu prezidi plenaria”.
Tuir deputada Maria Angelina, katak áktu krime ne’ebe deputadu/a sira komete ne’e, deputadu requerente sira hato’o ona keixa hasoru sira ba Prokuradár Jerál da Repúblika no hato’o katak ida ne’e áktu interferência Orgaun Soberania Estadu, Parlamentu Nasional, nia funsionamentu, hatudu momós blokeia funsionamentu, parlamentu labele hala’o plenária.
“Interferensia ida ne’e konstitui krime koasaun kontra orgaun konstitusionál no perturbasaun ba funsionamentu orgaun konstitusional, ne’ebé tuir Kódigu Penal punidu hanesan estipula iha Artigu 204 no 205”. Esplika deputada Maria Angelina. Uar
