Lere Seidauk Simu Relatóriu Militar Baku Joven iha Manu Meta Rai Hun

Fahe Tutan

Naunil Media (Díli), Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, hatete nia parte sedauk simu relatóriu konkreta ruma kona-ba kazu membru F-FDTL husi Komoponente Forsa Naval Ligeira baku juventude iha Manu Meta rai hun.

“Hau sedauk simu keixa ne’ebe formal, kuando hau simu ona keixa formal hau sei husu responsabilidade ba hau nia ema ne’ebe komete indisiplinar ne’e, mas hau mos la konkorda ema sivíl tau liman nafatin ba hau nia soldadu. Ida ne’e hau la konkorda”, Xefe Estadu Maiór Jenerál F-FDTL, Majór Jenerál Lere Anan Timur, ba jornalista sira hafoin sorumutuk rutina ho Prezidente Repúblika (PR) Francisco Guterres ‘Lú Olo’, iha Palásiu Prezidensiál Nicolau Lobato, Bairu Pité, Kuarta (29/07).    

Eis-gerileiru komandante Rejiaun Um Ponta Leste no atual Majór Jenerál Lere, husu ba ONG sira atu labele kompara fali FALINTIL-FDTL hanesan TNI no labele tau kanuru tohar ba asuntu militar.   

“Forza Defeza labele sai vítima nafatin, vítima ba funu ne’e bele mas vítima ba komunidade ne’e hau la konkorda. Por exemplo kazu ida foin dadauk iha Manu Meta Rai Hun ne’e, soldadu tauk tama uma nia maluk atu ba foti sai mai ema baku fali, ne’e informasaun ne’ebe mak hau rona, hau sedauk iha relatóriu kona-ba baku nia odamatan ne’e. Ikus mai mak hau rona, hau mak rona iha momento ne’eba karik hau mobiliza kompanhia ida ba buka buatamak ne’ebe mak baku Militar ne’e”, tenik veteran 24 anos ne’e atual Majór Jenerál Lere.

“Hau husu ba ONG sira atu labele tau kanuru tohar ba Militar nia assunto. Timor ne’e demokrasia la hanorin hanesan ne’e, Militar ne’e Militar nian, ema sivíl laiha direitu no laiha kompetensia tan atu hatama o nia kanuru tohar. Exemplu kestaun lojística, admistrasaun, kilat no buat seluk tan ligadu ho Militar, o kritika baku ema tenke fo ho evidensia la’os ba koalia fali iha media sosial enkuantu ninia komandante seidauk hatene”, afirma Xefe Estadu Maiór Jenerál F-FDTL, Majór Jenerál Lere Anan Timur.

Ikus-liu, Jenerál Lere, apela “Dala ida no alerta tan ba Populasaun iha Timor laran tomak hau lakoi populasaun sivíl tau liman nafatin ba Forsas Armadas, se Forsas Armadas sakrafika nia-an ba rai ida ne’e kuandu iha funu ruma, sá-tan sakrafika-án ba nia populasaun rasik, hau apela mos ba NGO sira atu labele ataka bebeik Forsas Armadas”. Pau

Leave a Reply

Your email address will not be published.