Prevene Sirkulasaun COVID-19 Mai TL, Jenerál Lere : “Komunidade iha Fronteira Tenke Kopera ho PNTL no F-FDTL”

Fahe Tutan

Naunil Media (Díli), Xefe Estadu Maiór Jenerál F-FDTL, Maijór Jenerál Lere Anan Timur, hateten atu prevene sirkulasaun Surtu Corona Virus Desease 2019 (COVID-19) mai Timor-Leste (TL), kumunidade sira mak hela besik iha fronteira terestre tenke kopera ho Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

Xefe Estadu Maiór Jenerál F-FDTL, Maijór Jenerál Lere Anan Timur, ba jornalista sira hafoin sorumutuk semanal ho Prezidente Repúblika (PR), Francisco Guterres ‘Lú Olo’, iha Palasiu Prezidensiál Nicolau Lobato, Bairru Pité, Kuarta (10/06).

“Ha’u hakarak apela ba komunidade sira ne’ebé mak hela besik iha liña fronteira, sira tenke kopera hamutuk ho polisia sira no ba ita nia forsa sira, tanba moras (COVID-19) mai, ne’e la’ós daet ba ema nain ida, maibé moras ne’e bele daet ba família uma laran. Agora  de’it ita haree iha  nasaun boot sira ne’e ema mate barak, tan de’it koalia larona ne’e mak ema mate barak”, Apela eis gerileiru komandante rejiaun um Ponta Leste no atual Xefe Estadu Maiór Jenerál F-FDTL, Maijór Jenerál Lere.

Líder másimu F-FDTL afirma, “Timor-oan sira labele abuza moras COVID-19, se ita halimar moras ne’e, loron ikus ita sei arepende”.

“Karik hetan ema ruma mak tama mai iha ita nia rain laran, tenke kaer para lori ba fatin kuarentena. Hodi prevene moras ne’e para labele daet tutan tan. Sé ita hadomi ita-nia família no nasaun  tenke halo tuir duni regras sira ne’e mak estadu estabelese ona iha ita nia rain”. dehan Lere. Pau

Leave a Reply

Your email address will not be published.