PD Sujere Muda Naran Uma Fukun PN Ba Muda Ba Uma Lisan

Fahe Tutan

Naunil Media (Díli), Prezidente Partidu Demokrátiku (PD) atual deputadu, Mariano Assanami Sabino, hateten relasiona ho problema ne’ebe sempre akontese iha Parlamentu Nasionál, PD iha ona hanoin atu submete proposta hodi muda naran Uma Fukun Parlamentu Nasionál (PN) ba Uma Lisan.

“Partidu Demokrátiku sei hola opsaun ida para muda tiha naran ida uma fukun, la’os ona uma fukun Parlamentu Nasionál maibé sai fali uma lisan Parlamentu Nasionál. Muda uma fukun Parlamentu Nasionál ba uma lisan Parlamentu Nasionál tanba fukun ne’e sempre iha problema, tanba ne’e ho eroi no martires sira nia tulun, ita sei dezenvolve uma sagradu ida ne’e ho dignu sai uma esperansa povu ni’an no sai hakmatek ba povu hodi dezenvolve Timor-Leste ida buras liu”, aprofunda deputadu bankada PD, Mariano Assanami Sabino, ba jornalista sira hafóin votasaun ba aprovasaun final global proposta Lei 17/V(2) kona-ba realizasaun transferénsia estra ordinária daruak husi Fundu Petrolíferu durante tinan 2020 no alterasaun dahuluk ba Lei numeru 2/2020, loron 6 fulan Abril, iha sala plénaria PN, Tersa (23/06).

Nia hatutan, semana oin PD sei halo deklarasaun iha plenária no sei submete kedas rezolusaun hodi hetan apoiu, husu bankada parlamentár sira hotu nia apoia kona-ba dezenvolve uma fukun PN ba fali Uma Lisan PN.

“Segunda feira Partidu Demokrátiku sei halo deklarasaun iha plenaria so mezmu tempu hato’o kedas rezolusaun ida hodi hetan apoiu husi bankada Parlamentár sira atu nune’e ita muda fali naran uma fukun Parlamentu Nasionál ba Uma Lisan Parlamentu Nasionál, la’os ona fukun tanba fukun sempre iha problema,  entaun iha ita nia tradisaun ne’e ita sempre bolu lisan”, hakotu Assanami. Uar

Leave a Reply

Your email address will not be published.