Kandidatura Prémiu Direitus Umanus “Sergio Vieira De Mello” Loke Ba Públiku
Naunil Media (Díli), Liu-husi komunikadu imprensa, Palásiu Prezidénsial Nicolau Lobato, Díli, 21 Outubru 2020, Prezidénsia Repúblika loke oportunidade ba sidadaun no organizasaun sira atu aprezenta nia kandidatura ba Prémiu Direitus Umanus “Sergio Vieira de Mello”, edisaun ba dala-13.
Sidadaun no organizasaun sira ne’ebé dedika nia an ba promosaun, protesaun no divulgasaun direitus umanus iha Timor-Leste bele aprezenta nia kandidatura husi 19 outubru-18 novembru 2020.
Anualmente Prezidente Repúblika atribui Prémiu Direitus Umanus “Sergio Vieira de Mello” iha 10 dezembru, Loron Internasionál ba Deklarasaun Universal Direitus Umanus, nu’udar rekoñesimentu estadu nian ba kontribuisaun husi sidadaun timoroan ka rai-li’ur, organizasaun governamental no la-governamental sira ba promosaun, protesaun no divulgasaun Direitus Umanus iha Timor-Leste.
Sidadaun no organizasaun sira ne’ebé promove, proteje no divulga direitus umanus bele aprezenta ninia kandidatura hodi manán Prémiu ne’e ho valór osan US $ 10,000 (Dolár amerikanu rihun-sanulu) ba manán-na’in iha kategoria ida-idak.
Prémiu Direitus Umanus sei fahe ba kategoria Direitus Sivis no Polítikus ba individu ka organizasaun sira ne’ebé sai defensór ba direitus umanus no Direitus Sosiais, Ekonómikus no Kulturais ba individu ka organizasaun sira ne’ebé dedika nia an ba promosaun atividades direitus umanus iha áreas Direitus Sosiais, Ekonómikus no kulturais, nomeadamente ba kombate pobreza, edukasaun, saúde, protesaun meiu ambiente no solidariedade sosiál.
Kritériu ba aprezentasaun kandidatura mak individu labele kandidata-an rasik, kada proponent bele aprezenta kandidatura ida de’it, ema ka instituisaun ne’ebé manán tiha ona Prémiu ne’e iha tinan-5 kotuk labele sai kandidatu, aprezentasaun kandidatura hakerek iha lian tetun ka portugés.
Prémiu Direitus Umanus “Sergio Vieira de Mello”, harii husi Dekretu-Lei númeru 15/2009, 18 marsu, atribui husi Prezidente Repúblika, ho objetivu destaka atividade sidadaun timoroan no rai-li’ur, organizasaun governamentais no la-governamentais iha promosaun, defeza no divulgasaun Direitus Umanus iha Timor-Leste.
Iha tinan-2019, Xefe Estadu atribui Prémiu Direitus Umanus “Sergio Vieira de Mello” ba manan-na’in ho kategoria Direitus Sosiais, Ekonómikus no Kulturais ba José Amaral Guterres, Marcelina dos Santos Cruz no Organizasaun Konservasaun Flora no Fauna (KFF). Manan-na’in ba kategoria Direitus Sivis no Polítikus mak José Luís de Oliveira no Virgillio da Silva Guterres “Lamukan”.
Bele hetan informasaun liután iha Palásiu Prezidénsiál Nicolau Lobato. Av. Pres. Nicolau Lobato, Bairro Pite, Dili, Timor-Leste.
KONTAKTU: Telemovel: +670 77036540, +670 74450421, +670 76740513 Email: premiodireitushumanos.rdtl@gmail.com Website: https://presidenciarepublica.tl/2020/10/formulariu-ba-kandidatura/ MÍDIA PR.
