RNDJ-CRDTL Sei Mobiliza Massa Hatun PR Lú Olo

Naunil Media (Dili), Porta voz Resistensia Nacionál Defende Justiça e Constituição República Democrática Timor-Leste (RNDJ-CRDTL), Ángela Freitas, hateten RNDJ-CRDTL sei mobiliza massa hasoru Prezidente Republika (PR), Francisco Guterres ‘Lú Olo’, hodi obriga nia (PR Lú Olo) rejigna-án, tamba durante foti dezisaun la reprezenta povu maibe reprezenta partidu Fretilin.

“Prezidente Republika la reprezenta ona povu no nasaun ida ne’e, ida ne’e iha ona interese partidu, tamba ita haree katak prosesu nomeiasaun to’o toma de posse”, Porta voz RNDJ-CRDTL, Ángela Freitas, ba jornalista sira liuhusi konferensia inprensa, iha sede Partidu Trabalhista Akait, Sesta (26/06).

Porta voz ne’e hatutan, bain hira prezidente Repúblika laiha desizaun ruma atu rejikna-án, Rejistensia Nasionál Defende Justisa e Constituição Republica Democrática Timor Leste, sei mobiliza massa halo asaun pasifiku hasoru Prezidente Repúblika.

“Dalan atu hatun Prezidente Repúblika mak tenke mai husi povu justisa popular ‘People Power’ justisa popular povu mak iha direitu, ukun ne’e pretense povu nian, ukun ne’e la’òs pertense ba ema ida ka rua nian, la’òs líder sira nian deit maibe povu nian, enkuantu la servi povu tuir konstituisaun povu iha direitu hamriik atu hasai fali ukun ne’e husi nai ulun sira ne’e hotu”, dehan porta voz RNDJ-CRDTL.

Tuir nia, Prezidenti ida ne’e la’òs Prezidente ba povu maibe prezidente FRETILIN, se prezidente ba povu tenke kumpri konstituisaun tamba nia eleitu ba nudar presidente nia jura ba konstituisaun ‘Cumpre e Fazer Cumprir’ maibe nia rasik mak viola konstituisaun tamba ne’e tempu to’o ona ba Prezidente Republika tenke Rejigna-án.

To’o notisia ne’e publika, Naunil Media seidauk halo konfirmasaun hosi Xefe Estadu Lú Olo. Uar