Vise-MAP Abilio Koileta Hare Nakroma Hektar 17 iha Aileu
Naunil Media (Aileu), Sesta (24/06) ne’e, Vise-Ministru Agrikultura no Peskas (MAP), Abilio Xavier de Araúrjo koileta hare tipu nakroma hamutuk hektar 17 husi Assosiasaun Esperansa Moris Di’ak iha suku Hoho-Lau, Postu Adiministrativu Aileu Villa no Munisipiu Aileu.
Vise-MAP, Abilio Xavier de Araújo, apresia ho rezultadu husi povu agrikultór sira, liu-liu Assosiasaun Esperansa Moris Di’ak no ba Assosiasaun Nasionál Produsaun Fini Komersiál Timor-Leste (ANAPROFIKO-TL).
“Ohin, Ita-nia povu agrikultór sira produs hare di’ak tebes, Governu mai haree. Ha’u haree diretamente rezultadu produsaun fini no ohin Ita bele koileta hare ne’e. Hanesan Governu, ami apresia tebes ba rezultadu husi povu agrikultór sira nian liu-liu Assosiasaun Esperansa Moris Di’ak no ba Assosiasaun ANAPROFIKO-TL”, Vise-MAP, Abilio Xavier de Araújo, ba jornalista sira hafoin seremonia kuileta hare iha suku Hoho-Lau.
Membru Governu konstitusionál da-ualu ne’e, hatutan Governu liu husi MAP sei tau perioridade ba fasilidade, irigasaun hodi hasa’e produsaun.
“Hau rona preokupasaun barak husi parte dirijente sira. Buat ne’ebe sira preokupa mak hanesan irigasaun, tratór no fasilidade sira seluk. Preokupasaun ne’e MAP presiza apoiu no tenke kooperasaun di’ak ho asosisaun sira”, tenik governante ne’e.
Iha fatin hanesan Prezidente ANAPROFIKO-TL, Ilidio Mau-Trcha Mendonca, hateten maske agrikultór sira servisu de’it ho manual, maibe ho rezultadu hare nakroma atinji pursentu 85 (%), tanba ne’e presiza apoiu husi Governu nian ba povu agrikultór sira.
“Hau sempre dehan, ANAPROFIKO-TL nia aman mak MAP no Ministériu Komersiu Industria, maibe durante ne’e seidauk la’o ho di’ak”, salienta Prezidente ANAPROFIKO-TL.
Dirijente ANAPROFIKO-TL ne’e, husu Governu tenke apoiu trantór, hadi’ak irigasaun no apoiu mina ba tratór nian, ba povu agrikotór sira.
Atividade koileta hare nakroma ne’e partisipa husi reitór UNDIL, José Belo hanesan Konsilleiru ANAPROFIKO-TL, autoridade suku, komunidade suku Haho-Lau no PNTL Munisípiu Aileu.
Hafoin atividade koileta hare nakroma, Vise-MAP kontinua halo dialogu ho autoridade sira suku no komunidade sira iha Sede Esperansa Moris Di’ak iha suku Hoho-Lau. Vit/Pau
