SEJD Fó Fiar ba UNE-TL Lidera Programa MRKF
Naunil Media (Díli), Prezidente União Nacionál dos Escuteiros de Timor-Leste (UNE-TL), Idelta Rodrigues, informa Governu konstitusionál da-ualu liu husi Sekretária Estadu Juventude no Desportu (SEJD) fó fiar ba UNE-TL lidera programa Movimentu Revolusaun Karakter Foinsae (MRFK) atu forma joven Timor oan sira sai sidadaun di’ak ba família no nasaun.
“Haree ba problema sosiais ne’ebé mak akontese, ita nia joven sira ho hahalok iha komunidade, patriotismu hahu mihis, tanba programa ida ne’e atu hala’o ba nivel sekundária”, Prezidente UNE-TL, Idelta Rodrigues, ba jornalista sira iha Eskola Tekniku Infórmatika Fómentu, Sesta (07/08).
Tuir Prezidente UNE-TL, Idelta Rodrigues, karakter joven sira nian liu-liu iha era globalizasaun hahu mundansa oi-oin, tanba ne’e presija rezolusaun konflitu iha meiu ambiente, étika moral no reflesaun ispiritual hodi forma joven sira.
“Ami nia lema ba programa ida ne’e mak Hadomi Ha’u Nia Eskola, signifika sira respeita buat hotu ne’ebé eskola fo hatene, obdese hatudu exemplu ne’ebé diak nune’e atu lori imajen ida ne’ebé diak ba sira nia eskola, estudate ida ne’ebé diak ba sira nia familia no ba nasaun”, tenik PrezidenteUNE-TL, Idelta Rodrigues.
Iha Fatin hanesan Diretor Eskola Tekniku Infórmatika (ETI), Deonizio de Jesus Ximenes, konsidera programa MRFK bele muda karakter joven sira nian liu-liu estudante sira.
“Husu ba UNE-TL atu realiza programa ne’e labele para iha ne’e deit, maibe tenki kontinua ba oin”, sujere Diretór ETI ne’e. Estudante ETI, Dircia Silva Graca, sente kontente ho programa MRFK tanba koalia barak liu kona-ba revolusaun karater. Emj1/Emj2
