IPDC Mantein Kompri Regra Prevensaun COVID-19
Naunil Media (Díli), Reitora Instituitu Profesional De Canossa (IPDC), Madre Elvina Martins Brito, informa estudante no professor/a sira iha IPDC mantein kompri regra sira prevensaun Surtu COVID-19, to’o Prezidente Repúblika (PR), Francisco Guterres ‘Lú Olo’ deklara tan Estadu Emerjénsia ba da-IV.
“Ami nafatin halo prevensaun, uza maskra, uza hand sanitezen, fase liman bei-beik inklui distansia sosiál”, Reitora IPDC, Madre Elvina Martins Brito, ba Naunil Media iha nia kna’ar fatin, Has Laran, Manleuana, Sesta (07/08).
Reitora IPDC, Madre Elvina Martins Brito, informa liu-tan durante ne’e kursu online la la’o tanba estudante sira barak mak la utiliza telephone android no la asesu rede internete.
“Ita haree situasaun rai laran hahan deit laiha atu han, entaun oinsa mak atu ba hola fali pulsa hodi asesu ba online, ne’e ita hanoin bele bosok malu ona no estudante barak mak la uza telefóne android no estudante barak mak ba tiha fóho”, tenik Reitora IPDC, Madre Elvina Martins Brito.
Reitora IPDC ne’e, dehan 01 fulan Jullu, sira hahu hikas ona aula apriendijazen hanesan babain.
“Kontinua materia sira ne’ebé maka sei tarde, tanba durante aula online estudante ho prefesór/a la iha treinamentu ba kursu online. Ami sei realiza ezame impar iha Setembru no ami sei hala’o aula par nian iha Outobru”, tenik Reitora IPDC, Madre Elvina Martins Brito.
Hafoin rona hanoin favorável husi membru sira husi Konsellu Superior Defeza no Seguransa no Konsellu Estadu, Prezidente Repúblika, Francisco Guterres Lú Olo, liu husi komunikadu imprensa, Kuarta (05/08) ne’e mak Naunil Media asesu husi Palásiu Prezidensiál Nicolau Lobato, Bairu Pité, ofiaisalmente Xefe Estadu Timor-Leste, ‘Lú Olo’ deklara Extende Estadu Emerjénsia ba da-IV hahu loron 06 fulan Agostu to’o remata loron 04 fulan Setembru tinan 2020. Jjf
