SEJD no APF-TL Selebra Loron Mundial Juventude ho Aktividade Doasaun Raan

Fahe Tutan

Naunil Media (Díli), Segunda (10/08) ne’e, Sekretaria Estadu Juventude no Desportu (SEJD) ho Alumni Parlamentu Foinsa’e Timor-Leste (APF-TL), sira hamutuk realiza programa doasaun raan hodi selebra loron mundiál ba juventude mak monu iha 12 fulan Agostu tinan 2020 ne’e.      

Diretór Jerál Servisu Korporativus SEJD, João dos Santos, hateten atividade doasaun raan parte ida husi selebrasaun loron mundial juventude tinan-2020, apresia ba APF-TL tanba kordenasaun di’ak hodi servisu hamutuk ho Governu mak bele hala’o programa refere.   

“SEJD apresia APF-TL ne’ebé kordena di’ak tebes ba realizasaun atividade importante ida ne’e. Agradese mos ba voluntáriu sira ne’ebé mak hola parte iha atividade ida ne’e, tamba raan turuk ida ne’ebé ita fo iha ne’e sei bele salva ita nia maluk seluk nia vida”, Diretór Jerál Servisu Korporativus SEJD, informa liu husi nia intervensaun abertura aktividade doasaun raan mak hala’o iha resintu SEJD, Lecidere.

Iha sorin seluk, Prezidente APF-TL, Zaulino Gomes da Silva, informa programa doasaun raan hala’o tanba hetan fiar husi Governu liu husi SEJD.  

“tinan ida ne’e APFTL hetan fiar husi sekretariu estadu juventude no desportu hodi toma responsabilidade ba aktividade selebrasaun loron mundial juventude ne’ebe sei monu iha dia 12 agustu”,  

Doasaun raan nu’udar aktividade ida husi atividade 5 ne’ebé mak APTFL ho SEJD konkorda atu hala’o hodi selebra loron mundial juventude tinan ida ne’e.

Atividade sira seluk mak, limpeza jeral iha Díli no kuda aiparapa iha Metinaro, kolokiu juventude no marsa saudavel. Tinan ida ne’e Timor-Leste selebra loron Juventude Mundiál ho tema “Juventude ba Asaun Global”. Ivo

Leave a Reply

Your email address will not be published.